Истиқлолият ва ҳамдилӣ

Дар Ҷамоати деҳоти Росровути ноҳияи Деваштич сокинони бунёдгару ташаббускори ин диёри зебоманзар баҳри сарбаландона пешвоз гирифтани 25-умин солгарди Истиқлолияти давлатии Ҷумҳурии Тоҷикистон корҳои созандагиро беш аз пеш тақвият дода, тариқи ҳашари умумӣ ва бо дастгирии мақомоти иҷроияи ҳокимияти давлатии ноҳияву соҳибкорону шахсони саховатпеша иқдомҳои таъмиру сохтмониро идома дода истодаанд.

Яке аз чунин иқдомҳои наҷибу созанда ин таъмири пуле, ки пайвандгари деҳаҳои Росровут, Метк ва Дашти Хишекат бо дигар деҳаҳо ва Ҷамоати деҳоти Росровут буда, бо сарварии Раиси Ҷамоат Раҳмон Шарипов амалӣ гардида истодааст. Дар мавзеъи пули таъмирёбанда корҳои васлу насбкунӣ ва соҳилмустаҳкамкунӣ бо ёрии техникаҳои ҳозиразамони сохтмонӣ дар авҷ буда, сокинони деҳаҳои зикршуда бо эҳсоси баланди ватандўстиву якдилӣ дастаҷамъона дар таъмири пул тариқи ҳашар иштирок доранд. Модарони ғамхору мушфиқ бошанд ҳамарўза барои сохтмончиён – фарзандони ватандўсту ба ору номуси худ се маҳал хўроки гарм омода ва дастрас карда истодаанд.



Чи тавре, ки яке аз иштирокчиёни ин маъракаи бунёдкорона Раиси Ташкилоти ибтидоии ҳизбии КИ ҲХДТ дар н.Деваштич ва хоҷагии деҳқонии «Н.Назаров» Зоид Расулов зикр намуд, «тамоми ин иқдом ва ташаббусҳои сокинони Ҷамоати деҳоти Росровут нишон аз дастгирии сиёсати созанда ва дастуру нишондодҳои ҳадафмандонаи Асосгузори Сулҳу Ваҳдати миллӣ, Пешвои миллат, Муҳтарам Эмомалӣ Раҳмон буда, туҳфаест бахшида ба ҷашни бузурги миллат».