Ҷамъбасти озмун дар н.Деваштич

Тибқи дастуру нишондодҳо ва Фармони Асосгузори Сулҳу Ваҳдати миллӣ, Пешвои миллат, Муҳтарам Эмомалӣ Раҳмон бахшида ба сазовор таҷлил намудани 25-умин солгарди Истиқлолияти давлатии Ҷумҳурии Тоҷикистон дар ноҳияи Деваштич озмуни «Маҳаллаи обод» ва «Оилаи намунавӣ» ҷамъбаст гардид.

Боиси тазаккур аст, ки тамоми сокинони ноҳия чунин иқдоми наҷиб ва шоистаи Сарвари давлатро бо хушнудӣ пазируфта, баҳри иҷрои он ҳамаҷониба омодагӣ диданд. Бахусус дар хотимаи тантанавии ҷамъбасти озмун аз ҷониби иштирокчиён баён гардид, ки чунин як чорабинии умумиҷумҳуриявӣ амсоле дар дигар кишварҳо надорад ва он таконе гардид, ки узви ҳар як ҷомеаи Тоҷикистони соҳибистиқлолу рӯй ба рушди устувор нигаронда, баҳри ободию шукуфоии маҳаллаву диёри хеш камари ҳиммат бандад. Ҳар як узви оилаи иштирокчии озмун кӯшиш ба харҷ дод, ки бо истифода аз тамоми урфу анъанаҳои беназири миллӣ, бо роҳандозии тарбияи насли наврас дар руҳияи хештаншиносиву ватандӯстӣ дар озмуни мазкур сарбаландона ширкат варзида, намунаи ибрат барои дигарон бошад. Зеро дар урфият мегӯянд, ки «ангур аз ангур гирад ранг».
Дар чорабинии ҷамъбастии озмун маҳаллаи Гулбоғи ҷамоати шаҳраки Ғончӣ ҳамчун «Маҳаллаи обод» баҳогузорӣ гардид. Инчунин дар фароварди чорабинии мазкур дар муассисаи томактабии №3, ки дар маҳаллаи Гулбоғ ҷойгир аст, маросими ифтитоҳи толори баргузории чорабиниҳо баргузор гардид, ки боз як дастоварди тарбиятгирандагон ва сокинони маҳалла буда, бо барномаи рангини фарҳангию адабии аз ҷониби кӯдакон омодашуда ҳусни анҷом ёфт.
Бобати ғолибият дар озмуни «Оилаи намунавӣ» оилаи Нуруллоев Фаррух Муҳидуллоевич сарбаландиро ба даст оварда, шарафи яке аз хонаводаҳои беҳтарину номиро дар ноҳия ҳимоят намуд. Мавриди зикр аст, ки хонаводаи Нуруллоевҳо ва Махкамовҳо дар маркази ноҳия ва ҳатто дар миқёси он номи некро соҳиб буда, аъзои ин хонавода шахсоне мебошанд, ки дар соҳаҳои гуногуни хоҷагии халқ аз худ асари самарабахшу манфиатовар барои давлату ҷамъият гузоштаанд.