МУСАВВАРАИ РАССОМИ ТОҶИК АМРИКОРО ТАСХИР КАРД

Мусаввараи рассоми навовари тоҷик, барандаи ҷоизаи “Уқоби тиллоӣ” дар Амрико–академик Зокир Собиров дар озмуни рассомии Амрико – «Мавҷи ҷадиди санъати муосир», ки дар равияи «Танворизм» ба озмун пешнҳод шуда буд, сазовори нишони тиллои «ИНТИХОБИ ҲАКАМОН» гардид.
Мусаввараи пешниҳоднамудаи Зокир Собиров «Фарёди солҳои 90» ном дошта, варшикастагии фарҳангу санъати миллии моро дар даврони нобасомонии ҷанги дохилӣ бозгу намуда, мушкилоти соҳаи санъат дар шакли рамзу аломатҳо тасвир гардидааст.
Қайд кардан ба маврид аст, ки қаблан низ ба мусаввараҳои ин рассоми шинохтаи тоҷик дар чандин озмунҳо ва намоишгоҳҳои байналмилалӣ, баҳои баланд дода шудааст. Зокир Собиров моҳи сентябри соли 2016 бо мусаввараҳои худ дар намоишгоҳи байналхалқии "Арт ЭКСПО —2016" дар шаҳри Дунхуани Ҷумҳурии Мардумии Чин иштирок кард. Президенти Академияи рассомони Русия Зураб Константинович Сиретелий дар намоишгоҳ осори рассоми тоҷикро дида, ба ӯ баҳои баланд дод ва ба Президиуми академия пешниҳод кард, ки Зокир Собиров ба узвияти Академияи Рассомони Русия қабул шавад. Ҳамин тариқ, санаи 18 октябри ҳамон сол Зокир Собиров дар шаҳри Москва бо шаҳодатнома, нишони тиллоӣ, дафтарчаи узвият ва ифтихорномаи Академияи рассомони Русия қадрдонӣ шуд.
Ёдрас мешавем, ки равияҳои «Нурворизм» ва «Танворизм» равияҳои навтарин дар санъати тасвирии ҷаҳонӣ буда, дар Амрико, Чин, Русия ва Украинаву Белорусия эътироф гардидаанд. Зокир Собиров асосгузори ин ду равияи рассомӣ буда, қаҳрамонони асарҳои ӯ чеҳраҳои саршиноси санъату фарҳанг ва сиёсати ҷаҳонӣ мебошанд.