Президенти Туркманистон тавсия дод, дар муассисаҳои давлатӣ ҳазориспанд дуд кунанд

Дар Туркманистон мавзуи паҳншавии вируси корона дар саросари ҷаҳон баррасии густарда надорад. Дар яке аз гуфтугӯҳо дар бораи вируси корона президенти он кишвар Қурбонгулӣ Бердимуҳаммадов тавсия дод, ки ҳазориспанд ҳамчун василаи пешгирӣ аз вируси нав истифода шавад.
Баъди ин тавсияи президент дар муассисаҳои давлатӣ ва мактабҳои Туркманистон маъракаи дуд кардани ҳазориспанд шуруъ шуд. Президенти Туркманистон 13 март гуфт, ки ба бовари вай, ҳазориспанд давои "чандин дард аст".
Ба иттилои расонаҳо, мақомоти Туркманистон борҳо ба сокинон тавсия додаанд, ки барои дармон ёфтанд аз бемориҳои гуногун ҳазориспанд истифода кунанд.
Мақомоти расмии Туркманистон расидани вируси навро ба ин кишвар тасдиқ намекунанд, аммо ҳанӯз 3 март расонаҳо хабар дода буданд, ки ҳадди ақал ду сокини кишвар ба вируси корона мубтало шудаанд.
Дар ҳамин ҳол, дар Туркманистон нуқтаҳои карантин ташкил шуда, шумори афроде, ки ба ин нуқтаҳо фиристода мешавад, ҳамарӯза дар ҳоли афзоиш аст.