Арабистони Саудӣ барои нафт тахфифи рекордӣ эълом кард

Нархи ҳар як бушка нафте, ки ширкати давлатии Арабистони Саудӣ - "Saudi Aramco" истихроҷ мекунад, 4–6 доллари ИМА поин хоҳад рафт. Вале ин тахфиф барои муштариёни амрикоӣ боз бузургтар хоҳад буд.

Тасмими мазкур дар вокуниш ба бурунрафти Русия аз созишномаи ОПЕК+ гирифта шуд, ки бузургтарин кишварҳои истихроҷкунандаи нафтро вазифадор мекунад, ҳаҷми истихроҷро ҳамоҳанг кунанд. Гуфтугӯҳои ахири Вена барои коҳиши истихроҷи нафт дар пайи коҳиши талабот ба иллати коронавирус бенатиҷа анҷом шуданд.

Пас аз ин гуфтугӯ нархи нафт дар ҷаҳон тақрибан 8 дарсад поин рафта, ба 45 доллар барои як бушка наздик мешавад. Тасмими ахири мақомоти Саудӣ низ ба поинтар рафтани арзиши нафт мусоидат хоҳад кард.

Созишномаи ОПЕК+ оид ба коҳиши истихроҷи нафт то ба 1,7 миллион бушка дар як шабонарӯз то охири моҳи марти соли равон амал мекунад. Вазорати энергетикаи Русия гуфт, аз 1 апрел ҳеч кишваре вазифадор нест, ки истихроҷи нафтро коҳиш диҳад.
Поинравии нархи нафт ба будҷаи Русия зарар дошта, ба беқурбшавии рубли русӣ низ мусоидат хоҳад кард.