Таҷлили Рӯзи Конститутсия дар Деваштич

Дар Қасри фарҳанги ноҳияи Деваштич ҷашни мубораку фархунда 22-юмин солгарди Рӯзи қабули Конститутсияи Ҷумҳурии Тоҷикистон бо шукуҳу шаҳомати хоса таҷлил гардид. Дар чорабинӣ Раиси ноҳия Ҷӯразода Рустам Боймурод, роҳбарони мақомоти ҳифзи ҳуқуқ, барқароркунандагони сохти конститутсионӣ, собиқадорони ҷангу меҳнат, раисони ҷамоатҳо, роҳбарони ташкилоту муассисаҳо иштирок намуданд.

Раиси ноҳия мӯҳтарам Ҷӯразода Рустам Боймурод чорабини мазкурро ифтитоҳ намуда дар суханронии хеш қайд кард, ки боиси ифтихор аст, ки Тоҷикистони соҳибистиқлол Конститутсияи навро қабул ва худро қисми ҷудонашавандаи ҷомеаи ҷаҳони эълон намуд ва дар моддаи аввали Қонуни асосии кишвар Ҷумҳурии Тоҷикистон давлати соҳибихтиёр, демократӣ, ҳуқуқбунёд, дунявӣ ва ягона буданаш қайд гардид. Дунявӣ будан, барои таҳкими робитаҳо бо ҷомеаи ҷаҳонӣ ва рушди минбаъдаи ҷанбаҳои сиёсӣ, иқтисодӣ, иҷтимоӣ ва фарҳангии кишвар роҳи васеъ кушод. Аз номи Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон мӯҳтарам Эмомалӣ Раҳмон ва аз номи худ ба муносибати Рӯзи қабули Конститутсияи Ҷумҳурии Тоҷикистон ҳамагонро табрику муборакбод намуда сиҳатмандӣ ва тамоми хушиҳои зиндагиро таманно намуд.

Дар охир барномаи фарҳангии ботаровати савту суруд ва назму наво, ки аз ҷониби аҳли санъати ноҳия ба истиқболи 22-юмин солгарди Рӯзи қабули Конститутсияи Ҷумҳурии Тоҷикистон омода шуда буд, манзури ҳамагон гардид.