Ба қадри сулҳу оромӣ бояд расид!

Дар толори зебою барҳавои маҷлисгоҳи Донишкадаи давлатии забонҳои Тоҷикистон ба номи Сотим Улуғзода бо иштироки кормандони масъули ҲХДТ ва донишҷӯёни донишкада вохӯрии хотирмоне дар мавзӯи «Сулҳ, субот ва дӯстӣ» доир гардид.
Ҷамъомадро муовини ректори донишкада оид ба корҳои тарбиявӣ С. Одинаев бо суханони муқаддимавӣ ифтитоҳ намуда, меҳмононро хайрамақдам гуфт.
Дар назди ҳозирин раиси КИ ҲХДТ дар ноҳияи Сино Н.Назаров дар боби ваҳдату осоиштагӣ, ҳаёти шукуфону озоди ҷавонони кишвар дар даврони истиқлолият суханронӣ намуд. Сипас, муовини раиси КИ ҲХДТ дар шаҳри Душанбе Абдулазиз Одинаев дар бораи таъкиду ғамхориҳои ҳамешагии Пешвои миллат, Президенти маҳбуби кишвар Эмомалӣ Раҳмон дар ҳаққи ҷавонон, мусоидати Ҳукумати Ҷумҳурии Тоҷикистон барои фароҳам овардани шароиту имкониятҳои ба талаботи давр ҷавобгӯ барои онҳо, дастгириҳои ҷавонони эҷодкори ҳамаи макотиби оливу миёнаи кишвар ва нақши ҷавонон дар рушду нумӯи ҳамаи соҳаҳо андешаронӣ намуд. «Ба қадри сулҳу оромӣ бояд расид. Таҷрибаи сулҳи моро ҷаҳониён эътироф намудаанд ва дар бисёр мамолик онро сарчашмаи омӯзиш қарор доданд», - суханашро идома дода гуфт А.Одинаев.
Вохӯриро бо чанд мисраи шеъри Шоири халқии Тоҷикистон, устод М.Турсунзода дар боби сулҳу дӯстӣ С.Одинаев муовини ректори донишкада оид ба корҳои тарбиявӣ ҷамъбаст намуд.
©Раҷаб Саидӣ, рӯзноманигори ҳафтавори «Мароми Пойтахт»