ИСТИФОДАИ МАҚСАДНОКИ ШАБАКАҲОИ ИНТЕРНЕТӢ...

АНДЕША. Ҳамаи мо хеле хуб медонем, ки ҷаҳонишавӣ ба ҳаёти шахсии одамон, аз ҷумла ташаккули арзишҳои оилавӣ таъсири бузург дорад. Мо айни замон дар давраи ҷаҳонишавии куллӣ зиндагӣ дорем, ки аз бисёр ҷиҳат дониш ва ҷаҳонбинии моро тағйир медиҳад, Ҷаҳонишавӣ ба тамоми ҷанбаҳои ҳаёти мо, яъне соҳаҳои иқтисодӣ, сиёсӣ, фарҳангӣ, оила, амният ва ҳаёти иҷтимоӣ таъсир мерасонад. Бо пайдоиши сомонаҳои интернетӣ сарҳадҳо дар муҳити иттилоотӣ аз байн рафтанд.
Дар баробари ин, муносибати ҷавонон ба зиндагӣ, арзишҳои моддиву маънавӣ ва равандҳои муошират тағйир ёфта, ниёзҳои моддӣ мақоми аввалро гирифт. Минбаъд ҷавонон фаъоланд ва муҳимтар аз ҳама, ба ин раванд таваҷҷуҳ зоҳир мекунанд. Ҷаҳонишавӣ ба ҷавонон, мутобиқшавии онҳо ба ҳаёти муосир ва дар ниҳоят ба шуури онҳо таъсир дорад. Ҷавонон чунин мешуморанд, ки ҷаҳонишавӣ ба ҳар яке аз онҳо имкон медиҳад, ки ҷаҳонбинии худро васеъ ва ба ҳама гуна маълумот дастрасӣ пайдо карда, сатҳи фарҳангии худро баланд бардоранд. Ҷавонон тавассути сомонаҳои интернетӣ, телевизион ва васоити ахбори омма саҳнаҳои зӯроварӣ ва бераҳмиро ҷойгир мекунанд, бозиҳои видеоӣ низ ҳамин нақшро мебозанд, дар натиҷа дар вуҷудашон ҳисси бераҳмӣ пайдо мешавад.
Вақтҳои охир ҷавонон хоҳиши хондани нашрияҳои чопшударо надоранд, балки онҳо аз васоити электронӣ истифода мебаранд. Акнун на хондан ва таҳлил кардан, балки гирифтани матнҳои тайёр дар шакли фишурдашуда осонтар аст. Ҳамаи ин ба шуури ҷавонон таъсир расонида, дар ниҳоят ба иҷтимоигардонии ҷавонон ва тарбияи насли оянда таъсир мерасонад. Ҷаҳонишавӣ ба бисёр одамони сайёра манфиат меорад, аммо дар баробари ҳамин мушкилоти зиёдеро низ ба вуҷуд меорад.
Бинобар ин ҳамаи мо ҷавононро зарур аст, ки аз шабакаҳои интернетӣ дуруст ва мақсаднок истифода намоему вақти тиллои худро дар сомонаҳои интернетӣ беҳуда сарф нанамоем. Мақсаднок истифода набурдани шабакаҳои интернетӣ боиси шомилшавиии ҷавонон ба ҳар гуна ҳизбҳои ифротӣ мегардаду ояндаи дурахшони мо ҷавононро хароб мегардонад.
Мирзоева Г., мудири шуъбаи таблиғот ва иттилооти КИ ҲХДТ дар н. Восеъ