ҶОМИ ҲИЗБИ ХАЛҚИИ ДЕМОКРАТИИ ТОҶИКИСТОН

Дар асоси нақшаи чорабиниҳои Дастгоҳи Кумитаи иҷроияи марказии Ҳизби Халқии Демократии Тоҷикистон, бахшида ба 26-солагии таъсисёбии ҲХДТ мусобиқаи футболи хурд байни кормандони Дастгоҳи КИМ ҲХДТ ва сохторҳои он дар шаҳри Душанбе, ноҳияҳои он ва шаҳру ноҳияҳои тобеи марказ барои дарёфти “Ҷоми Ҳизби Халқии Демократии Тоҷикистон” идома дорад.
Дар маросими кушодашавии мусобиқаи мазкур Латифзода Асрор Қурбон, муовини Раиси ҲХДТ ва Раҳмонзода Абдулло Қурбоналӣ, аъзои раёсати ҲХДТ, раиси кумитаи кор бо ҷавонон ва варзиши назди Ҳукумати Ҷумҳурии Тоҷикистон иштирок ва суханронӣ намуданд.
Зикр шуд, ки рушди варзиш яке аз самтҳои асосии фаъолияти Ҳизби Халқии Демократии Тоҷикистон ба ҳисоб меравад. Бо дарназардошти он, ки дар шароити кунунӣ варзиш ҳамчун василаи шоистаи муаррифгари миллату кишвар дар олам маҳсуб мешавад, ба рушди он таваҷҷуҳи махсус зоҳир намуда мешавад.
Ҳизби Халқии Демократии Тоҷикистон варзишро ҳамчун яке аз омилҳои муассири тарбия ва муаррифии шоистаи кишвар дар арсаи байналмилалӣ эътироф намуда, варзишгаронеро, ки бо иштироки фаъолона соҳиби ҷоизаҳои олимпӣ ва байналмилалӣ мегарданд, дастгирӣ ва барои ҷалби сармояи иловагӣ бо мақсади бунёди толору майдончаҳои варзишӣ талош мекунад. Ин нукта дар Барномаи пешазинтихоботии ҳизб низ баръало инъикос ётфтааст.
Ҳизби Халқии Демократии Тоҷикистон барои ҷавонон тавассути оммавигардонии варзиш, таблиѓи тарзи ҳаёти солим, омода намудани варзишгарони касбӣ, аз ҷумла ҳама навъҳои варзишҳои олимпӣ аз тамоми имкониятҳои мавҷуда истифода мебарад ва ба ҷалби ҳарчи бештари ҷавонон ба мусобиқаҳои варзишӣ диққати аввалиндараҷа медиҳад ва тавассути воситаҳои ахбори омма тарѓибу ташвиқи варзиш ва тарзи ҳаёти солимро васеъ ба роҳ мемонад.
Ҳизби Халқии Демократии Тоҷикистон “Сиёсати рӯй овардан ба ҷавонон”-ро, ки яке аз самтҳои асосии марҳалаи имрӯзаи рушди давлатдории миллӣ маҳсуб мешавад, тавсеа бахшида, дар роҳи расидан ба ин ҳадаф барои ҳарчи беҳтар гардонидани шароити рушди маънавию ахлоқӣ, таҳсил ва кору фаъолияти ҷавонон тадбирҳо меандешад.
Дар ин раванд, бояд дар зеҳну шуури насли наврас ва ҷавонони мамлакат ҳисси баланди миллӣ, эҳсоси гарми худшиносиву ватандӯстӣ, ахлоқи ҳамида, эҳтироми падару модар ва калонсолон, сабру таҳаммул, омӯзиши илму дониш ва касбу ҳунарҳои муосир, меҳнатдӯстӣ ва риояи волоияти қонунро тарбия намоем, то онҳо дар оянда ҳамчун фарзандони шоиста кору пайкори насли имрӯзаро идома бахшида, Ватани азизамонро ба ҷаҳониён муаррифӣ карда тавонанд.
Дар мусобиқаи футболи хурд барои дарёфти “Ҷоми Ҳизби Халқии Демократии Тоҷикистон” 10 даста, иштирок доранд. Феълан дастаи “Дастгоҳи КИМ ҲХДТ” дар гурӯҳи “А” ва дастаи “КИ ҲХДТ дар н. Шоҳмансур” дар гурӯҳи “Б” пешсаф мебошанд.
Ба ѓолибон ҷом, медал, сипоснома ва дигар туҳфаҳои хотиравии таъсиснамудаи кумитаи тадорукот супорида мешавад.