ДАР КОНФЕРЕНСИЯИ XXIII ҲХДТ ДАР ШАҲРИ КӮЛОБ НОМЗАДИ АРЗАНДА ПЕШБАРӢ ГАРДИД

Конференсияи XXIII ҲХДТ дар шаҳри Кӯлоб бо иштироки 338 нафар вакил доир гардид.
Дар кори Конференсия муовини аввали Раиси муаззами ҲХДТ Азизӣ Абдуҷаббор Абдуқаҳҳор, раиси Кумитаи иҷроияи ҲХДТ дар вилояти Хатлон Раҳмонзода Абдулло, раиси Кумитаи иҷроияи ҲХДТ дар шаҳри Кӯлоб Ҳамидиён Орзу ва дигар шахсони расмӣ иштирок намуданд.
Инчунин, дар Конференсия фаъолон, собиқадорони ҳизбу меҳнат ва меҳмонон аз сохторҳои давлативу ҷамъиятӣ, намояндагони васоити ахбори омма низ ҳузур доштанд.
Пас аз садо додани Суруди миллӣ ба таври зинда вакилон ҳайати раёсат, котибот ва комиссияи мандатиро интихоб намуда, ба кори Конеференсия ҳусни оғоз бахшиданд.
Конференсия тибқи рӯзномаи тасдиқшуда пешбарии номзад ба вакилии Маҷлиси намояндагони Маҷлиси Олии Ҷумҳурии Тоҷикистон дар ҳавзаи якмандатии интихоботии Кӯлоб №37”-ро баррасӣ намуд.
Аз рӯи масъалаи рӯзномаи маҷлис Ҳамидиён Орзу баромад намуда, қайд кард, ки дар асоси фармони Президенти Ҷумҳурии Тоҷикистон муҳтарам Эмомали Раҳмон аз 4 декабри соли 2019, таҳти рақами 1380 Интихоботи даъвати нави Маҷлиси намояндагони Маҷлиси Олии Ҷумҳурии Тоҷикистон ва Маҷлисҳои маҳаллии вакилони халқ рӯзи 1 марти соли 2020 таъин гардидааст.
Мутобиқи моддаи 30-юми Қонуни конститутсионии Ҷумҳурии Тоҷикистон «Дар бораи Маҷлиси Олии Ҷумҳурии Тоҷикистон» ҳизбҳои сиёсӣ ҳуқуқ доранд номзадҳои худро ба вакилии Маҷлиси намояндагони Маҷлиси Олии Ҷумҳурии Тоҷикистон дар ҳавзаҳои якмандатӣ низ пешбарӣ намоянд.

Сипас, муовини аввали Раиси ҲХДТ Азизӣ Абдуҷаббор баромад намуда, номзадии Ҳакимзода Шариф Саидовичро ба вакилии Маҷлиси намояндагони Маҷлиси Олии Ҷумҳурии Тоҷикистон пешниҳод намуд.

Дар ҳамин радиф вакилони Конференсия Ҳақназар Ғоиб, Зафар Мирзоён ва Ҳақназарова Зулайхо таклифи муовини аввали Раиси ҲХДТ-ро дуруст ва саривақтӣ ҳисобида, иброз доштанд, ки шахси пешбаришаванда воқеан арзанда мебошад.

Баъд аз овоздиҳии пинҳоҳӣ ва хулосаи комиссияи баҳисобгирии овозҳо Ҳакимзода Шариф Саидович бо гирифтани аксарияти овозҳо аз ҷониби вакилони Конференсия ҳамчун номзад ба вакили Маҷлиси намояндагони Маҷлиси Олии Ҷумҳурии Тоҷикистон аз ҳавзаи интихоботии Кӯлоб №37 пешбарӣ гардид.

Зимнан, Ҳакимзода Шариф ба сухан баромада, аз вакилон барои дастгирии ҳамаҷониба изҳори сипосу миннатдорӣ намуд. Мавсуф дар идома қайд кард, ки мекушад ба он эътимоду боварии вакилони Конференсия сазовор бошад ва барои халқу Ватан содиқона ва самимона хизмат намояд.

Дар фарҷом баъд аз қабули қарорҳо ба Конференсияи XXIII ҲХДТ дар шаҳри Кӯлоб танаффуси тӯлонӣ эълон карда шуд.