Ҳаққи роҳкиро дар шабакаи хатсайрҳои шаҳри Душанбе тағйир ёфт

ДУШАНБЕ, /АМИТ «Ховар»/. Аз 15 феврали соли 2018 ҳаққи роҳкиро дар шабакаи хатсайрҳои шаҳри Душанбе барои як мусофир тавассути автобус 1,20 (як сомонию бист дирам), троллейбус 1,00 (як сомонӣ), автобусҳои хурдғунҷоиш (микроавтобусҳо) 1,60 (як сомонию шаст дирам), автобусҳои бо реҷаи экспресс фаъолияткунанда 1,50 (як сомонию панҷоҳ дирам), автобус ва троллейбусҳо бо кортҳои кӯтоҳмуҳлати пардохти зудамал (QR-Kod) барои 4 ва 8 сафар мутаносибан бо арзиши 5 (панҷ) ва 10 (даҳ) сомонӣ муқаррар гардид. Дар ин бора қарори Раиси шаҳри Душанбе ба тасвиб расид.

Тавре аз Раёсати иттилоот ва робитаҳои хориҷии дастгоҳи Раиси шаҳри Душанбе хабар доданд, дар ҳолати аз ҷониби мусофирон харидани 50 ва зиёда аз он корти сафар тариқи кортҳои пластикии нақлиётӣ дар автобус ва троллейбус барои донишҷӯён 30 фоиз, барои дигарон 15 фоиз тахфиф пешниҳод мешавад.

Ҳаққи роҳкиро дар хатсайрҳои наздишаҳрии шаҳри Душанбе барои як мусофир тавассути нақлиёти мусофирбари ғунҷоишаш хурд ва миёна 2,00 (ду сомонӣ) муқаррар шудааст.

«Ин амал бо мақсади пурра қонеъ гардонидани эҳтиёҷоти аҳолӣ бо хизматрасонии нақлиётӣ, ҳифзи ҳуқуқ ва манфиатҳои истифодабарандагони хизматрасониҳои нақлиётӣ, ҳамоҳангсозии оқилонаи фаъолияти нақлиёти мусофирбар ва муҳайё намудани шароити якхела барои рақобати озоди субъектони хоҷагидор дар бозори нақлиётӣ, новобаста аз шакли моликият ва баланд бардоштани сатҳу сифати хизматрасонӣ ба мусофирон роҳандозӣ гардидааст», — афзуд манбаъ.