Истиқлолият - шарафу номуси ватандорӣ

Субҳи 5- уми сентябри соли равон саҳни бинои театри вилоятии мусиқӣ-мазҳакавии ба номи Ато Муҳаммадҷонови шаҳри Қӯрғонтеппа бо парафшонии парчамҳои давлативу ҳизбӣ, шодиву нишоти ҷавонони либосҳои миллӣ ба бар карда, идгоҳро мемонд. Ҷавонону даъватшудагон гурӯҳ-гурӯҳ дар саҳни бино ҷамъ омада, аз фазои сулҳу оромии кишвар, аз дастовардҳои соҳибистиқлолии ин сарзамини биҳиштосои Тоҷикистон шукрона мекарданд. Дар ин рӯзи фараҳбахш Конференсияи Ҳизби Халқии Демократии Тоҷикистон дар вилояти Хатлон ба ифтихори ҷашни пурсаодати миллии тоҷикон 26- умин солгарди Истиқлолияти давлатии Ҷумҳурии Тоҷикистон таҳти унвони «Истиқлолият – шарафу номуси ватандорӣ» бо шукуҳу шаҳомати хоса, дар сатҳи баланди сиёсиву фарҳангӣ баргузор гардид. Дар баргузории конференсияи номбурда узви Кумитаи Иҷроияи Марказии ҲХДТ, доктори илми фалсафа, муовини раиси вилояти Хатлон Хидирзода Махфират Умар, роҳбари Дастгоҳи Кумитаи иҷроияи Марказии ҲХДТ Абдураҳмон Хонов, вакили Маҷлиси намояндагони Маҷлиси Олии Ҷумҳурии Тоҷикистон, Раиси Фраксияи Ҳизби Халқии Демократии Тоҷикистон Сафарзода Бахтовар Амиралӣ, шоираи ватансарову ваҳдатсаро, роҳбари Анҷумани «Хубони порсигӯ» Меҳринисо Бобобекова, кормадони Дастгоҳи Кумитаи иҷроияи ҲХДТ дар вилояти Хатлон, фаъолон, аъзо ва ҷонибдорони ҲХДТ иштирок доштанд