Трамп барномаи махфии кӯмак ба мухолифони Сурияро қатъ кард

Президенти ИМА Доналд Трамп гуфт, барномаи махфии кӯмаки шӯришгарони Сурияро, ки зидди президент Башор Асад меҷангиданд, қатъ кардааст. Зеро, ин барнома "фарогир, хатарнок ва серхарҷ" буд, мегӯяд Трамп.
Дар ин бора президент баъди он хабар дод, ки чанд рӯз пеш генерал Тони Томас, роҳбари амалиёти вижаи ИМА аз хатми амалиёти чаҳорсола иттилоъ дода буд. Аммо Томас гуфт, ин қарор на ба хотири он қабул шудааст, ки "Русия - ҳомии ҳукумати Асад - ором гирад".

Трамп 24 июл дар Твиттер навишт: "The Washington Post" дар бораи қатъи барномаи фарогир, хатарнок ва серхарҷ аз сӯи ман далелҳои носаҳеҳ нашр кард".

Ин навиштаи Трамп посух ба матлаби нашрия буд, ки "The Washington Post" даъво дошт, ҳамкорӣ бо Москва калиди стратегияи Трамп дар Сурия шуд. Моҳи ҷорӣ ИМА ва Русия дар бораи таъсиси минтақаҳои амн дар ҷануби Сурия ба созиш расиданд.

Президенти пешини Амрико Барак Обама барномаи махфии кӯмакро соли 2013 - замоне, ки шӯришиён дар мубориза зидди Асад ба кӯмаки хориҷӣ эҳтиёҷ доштанд, тасдиқ карда буд. Бо ёрии ин барнома ҳазорон шӯришгар таълим гирифта ва мусаллаҳ шуда буданд.