Вохӯриҳо ба истиқболи ҷашни Ваҳдат

АЙНӢ. Бахшида ба «Соли ҷавонон» ва 20-умин солгарди «Ваҳдати миллӣ» гурӯҳи тарғиботӣ намояндагони Дастгоҳи иҷроияи Президенти Ҷумҳурии Тоҷикистон ҷиҳати таблиғу ташвиқи “Соли ҷавонон” ва 20-солагии «Ваҳдати миллӣ» ба ноҳияи Айнӣ ташриф оварданд. Ба гурӯҳи корӣ- директори Китобхонаи миллӣ Назарзода Сайфиддин, Идиев Файзалӣ-ходими калони илмии Институти фалсафа, Набиев Ваҳҳоб-устоди ДДХ, Атоев Муҳаммадиқбол мудири шӯъбаи Китобхонаи миллӣ ва Раиси КИ ҲХДТ дар ноҳияи Айнӣ Қобилзода Абдуғанӣ шомил мебошанд.

Гурӯҳи тарғиботӣ дар деҳаи Искодари ҷамоати деҳоти Дар-дар бо аҳолӣ вохӯрӣ гузарониданд. Вохӯриро Раиси КИ ҲХДТ дар ноҳия Қобилзода А. ҳусни ифтитоҳ бахшида, намояндагонро муаррифӣ намуд.
Директори Китобхонаи миллӣ Назарзода Сайфиддин дар баромади худ қайд намуд, ки Сарвари давлати мо мӯҳтарам Эмомалӣ Раҳмон ба мардуми мо сулҳ овард. Сиёсат ва амалӣ кардани он осон набуд, халқи сулҳдӯсти тоҷик ҳамаи мушкилиҳоро паси сар намуда, як давлати осоишта ва оромро ташкил дод ва ин давлат ташаккул меёбад. Устоди ДДХ Набиев Ваҳҳоб дар баромадаш қайд намуд, ки дар ҷанги таҳмилии шаҳрвандӣ зиёда аз 150 ҳазор нафар ҳалок шуданд ва пас аз гуфтушунидҳои тӯлонӣ санаи 27-июни соли 1997 Созишномаи умумии истиқрори сулҳ ва ризоияти миллӣ дар Тоҷикистон ба имзо расид. Ҳаракати Ваҳдати миллӣ ва эҳёи Тоҷикистон низ ташкил гардид, ки то ба имрӯз фаъолият дорад. Дар музокира Қудратов Иззатулло ва Шоахмедов Одил баромад намуда, қайд карданд, ки мо шукрона аз он мекунем, ки Пешвои миллат ба халқи азиятдидаи тоҷик сулҳ овард ва мо имрӯз дар фазои озоди Ватани обод хушбахтона зиндагӣ дорем, зеро сулҳ бошад халқ низ осуда зиндагӣ мекунад.Бо ҳамин вохӯрӣ ба анҷом расид. Ин гуна вохӯриҳо дар дигар ҷамоатҳои шаҳраку деҳоти ноҳия идома дорад.