«Нафит Ал-Васат» ва «Истиқлол» дар Теҳрон қувваозмоӣ мекунанд

Бозии даври севуми Ҷоми AFC-2016-ро дар гурӯҳи «В» миёни дастаҳои «Нафит Ал-Васат» –и Ироқ ва «Истиқлол»-и Тоҷикистон Суҳбир Сингҳ аз Сингапур доварӣ мекунад.

Ин сабқат миёни дастаҳои «Нафит Ал-Васат» ва «Истиқлол» 15 март дар Теҳрон, дар варзишгоҳи «Пас», соати 15:00 ба вақти маҳаллӣ (16:30 – ба вақти Душанбе) шурӯъ мешавад.

Мубин Эргашев, сармураббии «Истиқлол», ба ҳайати даста ба бозӣ муқобили қаҳрамони Ироқ 17 бозигарро дохил кардааст.

Ёдовар мешавем, дастаи «Истиқлол», қаҳрамони чаҳоркаратаи Тоҷикистон, дар даври аввали сабқати интихобии Ҷоми Конфедератсияи футболи Осиё-2016 бозиро бо тими «Ал-Файсали»-и Урдун, барандаи дукаратаи Ҷоми AFC, бо ҳисоби мусовӣ ва бидуни гол анҷом дод. Ин бозӣ 23 феврал дар Варзишгоҳи марказии Душанбе баргузор шуда буд.

«Истиқлол» дар даври дувум аз дастаи мизбон - «Триполи», собиқ қаҳрамон ва барандаи дукаратаи Ҷоми Лубнон, бо ҳисоби 1:2 шикаст хӯрд. Ин бозӣ 8 март дар варзишгоҳи «Триполи»-и шаҳри Триполи баргузор шуд.

Феълан дар ҷадвали гурӯҳи «В» дастаи «Ал-Файсали» бо 4 имтиёз мақоми аввалро касб кардааст. «Нафит Ал-Васат» ва «Триполи» бо 3- имтиёзӣ мутаносибан дар ҷойҳои дувуму севум қарор доранд. «Истиқлол» бо як имтиёз дар зинаи охир аст.