Бақайдгирӣ Ворид
Ворид ба сомона
tj
» » » » Нашри хабарҳо бо забони тоҷикӣ дар сомонаи ВУХ-и Узбекистон

Нашри хабарҳо бо забони тоҷикӣ дар сомонаи ВУХ-и Узбекистон

13-03-2018, 10:11
Хабарро хонданд: 153 нафар
Назарҳо: 0
Нашри хабарҳо бо забони тоҷикӣ дар сомонаи ВУХ-и Узбекистон
Вазорати умури хориҷии Узбекистон як бахши вебсайт ё торнамои расмиашро бо забони тоҷикӣ (хатти сириллик) таҳия кард. Ин гӯша охири соли гузашта роҳандозӣ шуда, бо хабарҳои марбут ба сафари давлатии Шавкат Мирзиёев, раиси ҷумҳури Узбекистон ба Тоҷикистон ва ифтитоҳи чанд гузаргоҳи марзӣ миёни ду кишвар такмил ёфтааст.
Бознашри гузоришҳои "Овози тоҷик"
Дар гузашта матолиби вебсайти расмии Вазорати корҳои хориҷии Узбекистон танҳо бо забонҳои узбекӣ (хатти лотинӣ) ва русиву англисӣ дастрас буд. Мақомоти Вазорат рӯзи 9-уми марти имсол гуфтаанд, ҳадаф аз ин тасмим огоҳи ҳарчи бештари тоҷикзабонҳо аз ҳаёти сиёсии Узбекистон аст. Онҳо гуфтаанд, ин гӯша бо кӯмаки ҳайати эҷодии "Овози тоҷик", нашрияи расмии Маҷлиси Олӣ ва ҳукумати Узбекистон ташкил шудааст. Ин нашрия аз соли 1924 боз нашр мешавад.
"Давраи нави ҳамкорӣ"
Нахустин матлаб дар гӯшаи "Хабарҳои Ӯзбекистон"-и торнамои Вазорати корҳои хориҷии Узбекистон суханронии Шавкат Мирзиёев дар Созмони Милали Муттаҳид аст, ки охири моҳи сентябри соли гузашта нашр шудааст. Дертар дар ин бахш изҳороти ӯ дар Самарқанд ва инчунин, паёмаш ба Маҷлиси Олиро бо забони тоҷикӣ гузоштаанд.
Тайи се моҳи имсол низ дар ин гӯша тақрибан даҳ матлаб чоп шудааст, ки аксари онҳо ба беҳбуди равобити миёни Тоҷикистону Узбекистон ихтисос ёфтаанд. Охирин матлаб дар ин гӯша “Ӯзбекистон – Тоҷикистон: Давраи навини ҳамкорӣ...” аст. Муаллифони гузориш дар бораи сафари давлатии Мирзиёев ба Тоҷикистон гузориш дода, аз ҷумла таъкид намудаанд, ки “дар диёрамон беш аз 1,5 миллион тоҷик истиқомат менамояд. Дар 10 минтақаи мамлакат марказҳои милливу мадании тоҷикон фаъолият менамоянд. Дар донишгоҳҳои давлатии Самарқанд, Тирмиз, Фарғона ба забони тоҷикӣ машғулият ба роҳ гузошта шудааст.”
"Шиносу ношинос якдигарро ба оғӯш мегирифтанд"
Зоҳир Ҳасанзода ва Амина Шарофиддинова, фаъолони ҷамъияти тоҷикон дар Узбекистон дар матлаби дигаре аз лаҳзаҳои ифтитоҳи гузаргоҳи Саразм-Ҷартеппа дар марзи Панҷакенту Самарқанд нақл кардаанд. Онҳо ба ҳайси шоҳиди он лаҳзаҳо гуфтаанд, “аз Самарқанд то сарҳад базми шеър, савту наво авҷ гирифт ва мо чӣ тавр то манзил расидани худро нафаҳмидем. Дар даромадгоҳи шаҳри бостонии Панҷакент парчамҳои Ӯзбекистону Тоҷикистон дар дасти садҳо нафар ҳозирон алвонҷ мехӯрданд, шиорҳо бо тараннуми дӯстӣ ба назар мерасиданд. Шиносу ношинос якдигарро ба оғӯш гирифта, табрику таҳният мекарданд, хайра мақдам мегуфтанд.”
Хилватшоҳи Маҳмуд, рӯзноманигори тоҷик, рӯзи 11-уми март дар суҳбат бо Радиои Озодӣ гуфт, бори аввал аст, ки як идораи расмии Узбекистон бо забони тоҷикӣ матлаб нашр мекунад. “Аз соли 1998-99 то 2018 дар Узбекистон ба ҷуз 5 рӯзномаи тоҷикӣ, чанд мактаб ва ду ё се факулта дар донишгоҳу донишкадаҳо чизе ба забони тоҷикӣ набуд”, - гуфт ӯ.
"Қадамҳои муҳими Тошканд"
Ин рӯзноманигори тоҷик дар идома аз тасмими ахири Вазорати умури хориҷии Узбекистон ҷонибдорӣ кард ва афзуд, “метавон гуфт, ки Тошканд, воқеан, барои тақвияти ҳамкориҳо ва расми неки ҳамсоядорӣ гомҳоеро пиёда мекунад.”
Шавкат Мирзиёев, раиси ҷумҳури Узбекистон, рӯзи 9-уми март бо сафари давлатӣ ба Тоҷикистон омад. Дар ҷараёни сафари ӯ, ба қавли мақомот, таърихии ӯ ба Душанбе 27 санаду созишнома имзо гардид, ки аз ҷумла ба шаҳрвандони ду кишвар ҳақ медиҳад, бидуни виза то сӣ рӯз ба қаламрави якдигар равуо кунанд.
Ҳазорҳо нафар ин лаҳзаҳоро таваллуди дигар номида, гуфтаанд, ба беҳбуди равобити миёни ду кишвар мутмаинтар шуданд.
Мақоми мавод:
  
Чоп
Хонандаи азиз, ба сомона Шумо ҳамчун истифодабарандаи қайднагардида ворид гардидед. Аз ин рӯ, барои пайдо намудани имкониятҳои бештари сомона ба Шумо тавсия медиҳем, ки худро ба қайд гиред ва ё бо номи қайдшудаи худ вориди сомона гардед.
Назари худро гузоред
Номи Шумо: *
E-mail: *
Матни назар:
Полужирный Наклонный текст Подчеркнутый текст Зачеркнутый текст | Выравнивание по левому краю По центру Выравнивание по правому краю | Вставка смайликов Вставка ссылкиВставка защищенной ссылки Выбор цвета | Скрытый текст Вставка цитаты Преобразовать выбранный текст из транслитерации в кириллицу Вставка спойлера
Рамз: Включите эту картинку для отображения кода безопасности
Агар рамз ноаён бошад, он гоҳ пахш намоед
Рамзро ворид кунед: