Дар ноҳияи Фирдавсии шаҳри Душанбе ду ташкилоти ибтидоии ҲХДТ таъсис дода шуд

Дар асоси талаботи Конститутсия, Қонуни Ҷумҳурии Тоҷикистон “Дар бораи ҳизбҳои сиёсӣ” ва Оинномаи ҳизб, кормандони ҶСП “Тоҷиквнештранс” ва ҶСП “Нашриёти муосир” барои таъсиси ташкилоти ибтидоии ҳизбӣ ва пайвастан ба сафи Ҳизби Халқии Демократии Тоҷикистон ба Кумитаи иҷроияи ҳизб дар ноҳияи Фирдавсӣ муроҷиат намуданд.

Дар асоси санадҳои меъёрӣ-ҳуқуқӣ вобаста ба фаъолияти ҳизбӣ 11-уми майи соли ҷорӣ дар маҷлисгоҳи ҶСП “Тоҷиквнештранс” ҷиҳати таъсиси ташкилотҳои ибтидоии ҳизбӣ дар корхонаҳои мазкур маҷлиси муассисон баргузор гардид.

Дар маҷлис роҳбарияти Кумитаи иҷроияи ҳизб дар ноҳияи Фирдавсӣ иштирок ва суханронӣ намуданд. Раиси Кумитаи иҷроияи ҳизб дар ноҳияи Фирдавсӣ Абдураҳим Шоҳиён оид ба нақши аҳзоби сиёсии кишвар дар ташаккули давлатдории навини Тоҷикистон, хусусан нақши аъзо ва ҷонибдорони ҲХДТ дар рушду пешрафти сиёсӣ, иқтисодӣ, иҷтимоии кишвар ва ташаккули ҷомеаи шаҳрвандӣ ҷиҳати мусоидат дар ҳалли мушкилоти мардум ибрози андеша намуданд.

Таъкид гардид, ки вобаста ба ҷаҳони зудтағйирёбандаи муосир ҳизбиёнро зарур аст, ки фаъолияти худро бозбинӣ намуда, дар муборизаҳои иттилоотӣ баҳри ҳимояи манфиатҳои миллӣ пешқадаму фаъол бошанд. Зикр шуд, ки обрӯ ва нуфузи ҲХДТ дар ҷомеаи кишвар ва берун аз он бо хизматҳои хастагинопазири Пешвои миллат, Раиси муаззами ҳизб, муҳтарам Эмомалӣ Раҳмон тавъам аст.

Дар кори маҷлис оид ба самтҳои Паёми Президенти Ҷумҳурии Тоҷикистон ба Маҷлиси Олӣ вобаста ба ҳифзи ҳуқуқу озодиҳои инсон ва шаҳрванд, волоияти қонун, адолати судӣ, ҳимояи манфиатҳои давлат ва баланд бардоштани фарҳанги сиёсию ҳуқуқии шарҳвандон ибрози андеша карда шуд.

Дар кори маҷлиси муассисон роҳбарияти ташкилотҳои ҳизбии “Роҳи умед” ва “Нашриёти муосир” интихоб гардида, шаҳодатномаҳои аъзои нави ҳизб дар вазъияти тантанавӣ тақдим карда шуданд.