Трампу Путин аз "нахустин қадамҳо"-и барқароршавии робитаҳо истиқбол карданд

Дар Финландия 16 июл мулоқоти президентҳои ИМА ва Русия - Доналд Трамп ва Владимир Путин баргузор шуд. Гуфтугӯи пушти дарҳои бастаи ҷонибҳо, ки қарор буд, 90 дақиқа давом кунад, беш аз ду соат идома ёфт.

Трампу Путин гуфтанд, ки дар роҳи барқарорсозии "робитаҳои дуҷонибаи сардшуда" "нахустин гом"-ро гузоштанд.

Президенти ИМА изҳор дошт, ки дар мулоқот бо ҳамтои русаш масъалаи дахолати эҳтимолии Москва ба интихоботи президентии ИМА-ро матраҳ кард ва онро хеле тӯлонӣ баррасӣ карданд. Путин дар навбати худ гуфт, Русия ҳечгоҳ ба интихоботи ИМА дахолат накардааст ва нахоҳад кард.

Трамп низ афзуд, ки ба назари ӯ, бо ҳадафи дахолат ба раванди интихоботи президентии ИМА ҳеч гуна созише бо ҷониби Русия сурат нагирифтааст.

Ба гуфтаи Трамп, дар мулоқот ҳамчунин масъалаи Эрон ва Сурия низ баррасӣ шуд. Трамп гуфт, ҷангиёни гуруҳи даҳшатафкани "Давлати исломӣ" дар Сурия 99% шикаст хӯрданд ва дар ин бобат саҳми Русияро низ зикр кард.

"Мулоқоти имрӯз танҳо оғози муколама аст. Ин чаҳор соат хеле созанда буданд. Бовар дорам, дар оянда зуд-зуд мулоқот хоҳем кард", - изҳор дошт Трамп.

Путин дар поёни дидор ба ҳамтои амрикоияш тӯби футболи Чемпионати ҷаҳонии 2018-ро тақдим карда, дар гузаронидани ин мусобиқаи ҷаҳонӣ дар соли 2026, ки қарор аст, дар Амрико, Канада ва Мексика баргузор шавад, комёбӣ таманно кард. "Тӯб акнун дар майдони шумост", - афзуд Путин.