Ман вориси Рустами достон

Мо аскари сомонем.
Шерони хуросонем.
Ин хоки ниёгонро.
Пайваста нигаҳ дорем.

Барои насли наврас даврони Истиқлолият хизмат дар сафи Қувваҳои Мусаллаҳи мамлакат муҳимтарин мактаби обутоби ҳаётӣ мебошад. Маҳз дар ҳамин ҷо ҷавонписарон сабақи шуҷоату мардонагӣ гирифта, муҳофизат кардани хоки Ватанро меомӯзанд. Вақте, ки мо ватандӯстӣ мегӯем, пеш аз ҳама муҳофизати Ватан ва якпорчагии марзу буми кишварро дар назар дорем. Вазифаи ҳар як шаҳрванди ватандӯст афзун намудани дастовардҳои Истиқлолият ва таҳкими рукнҳои давлатдорӣ аст, ки яке аз ин рукнҳо Қувваҳои Мусаллаҳи Тоҷикистон мебошад.
Бахшида ба Рўзи таъсисёбии Қувваҳои Мусаллаҳи Ҷумҳурии Тоҷикистон дар Боғчаи №1-и ноҳияи Деваштич ҷамъомад таҳти унвони «Мо вориси Рустами достон» баргузор гардид. Мақсад аз баргузории ин чорабинӣ тарбияи насли наврас дар руҳияи ватанпарвариву хизмат намудан ба Ватан мебошад. Роҳбари НТҶҶ «Созандагони Ватан» Сарвар Саидов иштирокчиёнро бо Рӯзи Артиши миллӣ табрик намуда, барои ташкили ин чорабинӣ ба масъулин миннатдории хешро баён кард. Ба барномаи рангини тарбиятгирандагони Боғча аз ҷониби аҳли толор баҳои баланд дода шуд. Дар охир барои иштироки фаъоли дӯстрӯякон туҳфаҳо супорида шуд.

Лоиқ Тӯйчиев