«Ман ҳам вориси Рустами Достон…»

Баҳри хотирмон ҷашн гирифтани 25-умин солгарди Истиқлолияти давлатии Тоҷикистон ва дар асоси нақшаи Кумитаи иҷроияи Ҳизби Халқии Демократии Тоҷикистон дар вилояти Суғд дар ҳамкорӣ бо бахши ҷавонон, варзиш ва сайёҳии ноҳияи Ғончӣ ва НТҶҶ «Созандагони Ватан»-и ноҳия «Рӯзи дарҳои кушод» дар қисми низомии 04533-и ноҳияи Ғончӣ баргузор гардид, ки дар он ҷавонони синну соли даъвати ҳарбӣ аз муассисаҳои таълимии ноҳия ширкат варзида, аз шароити буду бош, машқу тармим ва вақтҳои истироҳатии сарбозон аз наздик шиносоӣ пайдо карданд.

Дар чорабинии мазкур мудири Бахши ҷавонон, варзиш ва сайёҳии ноҳия, узви фаъоли ҳизбӣ Бунафша Қутбиддинова, сармутахассиси бахш Содирхон Баҳодуров ва и.в.Раиси Шӯрои НТҶҶ «Созандагони Ватан» Сарвар Саидов ҷавононро роҳбаладӣ намуда, аз тамоми имконияту шароитҳои барои сарбозон муҳайёгардида онҳоро шинос намуданд ва дар рафти чорабинӣ зикр намуданд, ки ояндаи Тоҷикистон аз матонату мардонагии насли оянда вобаста буда, ҳар қадами неки онҳо пойдории Сулҳу Ваҳдати миллӣ ва ободии Тоҷикистони азизу маҳбубро таъмин менамояд, зеро имрӯз дар шароити ҷаҳонишавӣ ҳар фарди кишвар ба ҷасорати қаҳрамононаи фарзандони нексиришту Ватанпарвари он эҳтиёҷ дорад. Сулҳу суботи ҷомеа аз хизмати мардонавори онҳо вобастгаии калон дорад. Беҳуда «Ватан – Модар» нагуфтаанд, то ки ҳар фарзанд ҳимояи Ватани худро ҳамчун ифои вазифаи фарзандии худ дониста, масъулияти хешро дар назди волидайну наслҳои ояндаи хеш эҳсос намояд.

Дар чорабинии мазкур муҳассилин – ҳомиёни ояндаи Ватан, аз шароитҳои имрӯзаи барои сарбозон фароҳамовардашуда шинос гардида, бо яроқу лавозимоти ҷангӣ аз наздик ошноӣ пайдо карданд ва бо иҷрои меъёри ҳарбӣ тариқи амалӣ дидан намуда, барои худ дарси ҳарбӣ – дифоӣ гирифтанд.