Расулзода Ҳ: Ифлосшавии таркиби ҳаворо низ пешгўӣ хоҳем кард

Масъулини Агентии обуҳавошиносӣ тасмим гирифтаанд, ки дар ояндаи наздик дар баробари пешгўӣ намудани вазъи обу ҳаво, инчунин аз вазъи ифлосшавии таркиби он низ ба аҳолии маълумот диҳанд.

Дар ин бора 27 сентябри соли равон Расулзода Ҳомидҷон, директории Агентии обуҳавошиносии Кумитаи ҳифзи муҳити зисти назди Ҳукумати Ҷумҳурии Тоҷикистон, зимни як ҷаласаи вижа, ки ба 90-солагии агентии мазкур бахшида шуда буд, иттилоъ дод.
Номбурда мегўяд, зиёда аз ду моҳ аст, ки мутахассисони Агентии обуҳавошиносӣ оид ба ин масъала кор бурда истодаанд. -Мо тасмим гирифтаем, ки дар ояндаи начандон дур дар баробари пешгўии вазъи обу ҳавои кишвар, инчунин вазъи ифлосшавии таркиби ҳаворо низ ба тариқи ВАО ба мардуми кишвар пешгўӣ намоем,-гуфт сардори Агентӣ.
-Айни ҳол мо тариқи сомонаи марказ дар бораи вазъи ифлосшавии муҳити атроф дар шаҳрҳои Душанбе, Қўрғонтеппа ва Хуҷанд маълумотҳоро пешкаш намуда истодааем»,-афзуд Расулзода Ҳомидҷон.
Аммо директории Агентии обуҳавошиносӣ дар ин нишаст аз бетаваҷҷуҳии масъулини ширкатҳои мобилӣ изҳори нигаронӣ намуда, иброз дошт: «Мо аз роҳбарони ширкатҳои мобилӣ хостем, ки бо мо ҳамкорӣ кунанд ва дар бораи вазъи ҳавои кишвар ба муштариёни худ тариқи СМС паёмак маълумот диҳанд. Вале мутаассифона онҳо ин хоҳиши моро напазируфтанд. Мо аввалҳои соли равон ба ҳамаи ширкатҳои мобилӣ мактуб фиристодем, вале то ҳол посух нагирифтаем. Агар ширкатҳои мобилӣ барои ҳамкорӣ бо мо розӣ шаванд, ба манфиати кор хоҳад буд».
И.Тоҳир