Ҷаласаи навбатии ситоди обуна

Ҷаласаи навбатии ситоди «Обуна-2017» ба нашрияҳои «Минбари халқ» ва «Сухани халқ» таҳти раёсати раиси кумиҷроияи ноҳиявии ҲХДТ Наимҷон Назаров баргузор гардид. Дар кори ситод аъзои ситод, раисони ташкилотҳои ибтидоии минтақавӣ, муовинони озоди раисони КИИ иштирок намуданд.

Раиси ситод Н.Назаров оиди рафти маъракаи обуна, меъёри муқарраргардида, мувофиқи ташкилотҳои ибтидоӣ ахборот дода, аз фаъолияти ситод ва аъзои он изҳори нигаронӣ намуд. Ӯ масъулинро вазифадор кард, ки маъракаи обунаро муташаккилона оғоз намуда, рӯзи панҷшанбеи ҳар ҳафта, ба ситоди ноҳиявӣ ахборот пешниҳод намоянд.

Раиси ситод зимни баромадаш қайд кард, ки фаъолияти «Созандагони Ватан» дар ин самт ҷоннок карда шуда, байни ҷавонон ва занон корҳои тарғиботӣ-ташвиқотӣ оиди маъракаи обуна ба рӯзномаҳои «Минбари халқ» ва «Сухани халқ» дар сатҳи зарурӣ ба роҳ монда шавад.

Ҳамчунин ба вакилони маҷлисҳои вилоятиву ноҳиявӣ, аъзоёни кумиҷроияву раёсат супорида шуд, ки ба рӯзномаҳои «Минбари халқ» ва «Сухани халқ» то охири моҳи июл обуна шаванд.

Мутасаддиёни соҳаи маориф, тандурустӣ, савдо ва ҷамоатҳои ноҳия ваъда доданд, ки нақшаи обунаро ба рӯзномаҳои «Минбари халқ» ва Сухани халқ» дар мӯҳлати муайяншуда иҷро мекунанд.