Абармарди роҳи озодӣ

Чанде пеш дар муассисаи таҳсилоти миёнаи умумии рақами 12- и ба номи Шириншоҳ Шоҳтемури ноҳияи Шуғнон ба истиқболи 120-умин солгарди Шириншоҳ Шоҳтемур конфренсия доир гашт.
Дар оғоз муовини раиси ноҳияи Шуғнон Гулғунча Саидарабзода аз зиндагиномаи Шириншоҳ Шоҳтемур ёд кард ва нақши ӯро дар таърихи тоҷик муассир маънидод намуд.
Сипас хонандагони муассиса аз эҷодиёти шоирони тоҷик дар васфи ин шахсияти бузурги миллат шеърҳо қироат намуданд.
Саҳначаеро, ки хонандагон аз намоишномаи Ғанӣ Абдулло «Сарбозони инқилоб» пешкаши толибилмон намуданд, хеле ҷолиб буд ва аҳли толор ба ҳунарнамоии толибилмон каф куфтанд.
Сарвари мактаб Парвингул Елчибекова иброз дошт, ки насли наврас бояд аз он фахр дошта бошанд, ки Шириншоҳ Шоҳтемур зодаи ин диёр ва хатмкардаи ин дабистон аст. Хизматҳои бузурги ӯро дар таҳкими давлатдории Ҷумҳурии Тоҷикистон ва дар роҳи худшиносии миллӣ ба эътибор гирифта, бо фармони Асосгузори сулҳу ваҳдати миллӣ- Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон 27 июли соли 2006 дар рӯзи Ваҳдати миллӣ ба ӯ унвони Қаҳрамони Тоҷикистон доданд.
Дар анҷом Гуландом Назаршоева, собиқадори меҳнат гуфт, ки «фаъолияти Ш. Шоҳтемур барои насли наврас ибратомӯз аст, мо аз чунин фарзандон ифтихор дорем ва ман аз шумо толибилмон хоҳиш мекунам, ки хонед, илму адаб омӯзед, то номбардори аҷдодони бузурги худ бошед».
Ёрасен Амадбеков, Зулфия Давлатқадамова, ноҳияи Шуғнон