ЭЪЛОНИ ОҒОЗИ МОҲИ ШАРИФИ РАМАЗОН ДАР ТОҶИКИСТОН

Маркази исломии Тоҷикистон дар якҷоягӣ бо Институти астрофизикаи Академияи илмҳои Ҷумҳурии Тоҷикистон муайян намудааст, ки мувофиқи ҳисобҳои илмӣ аввали моҳи шарифи Рамазон дар соли 2019 ба рӯзи душанбе, 6-уми май рост меояд. Дар ин бора Шӯрои уламои Маркази исломии Ҷумҳурии Тоҷикистон иттилоъ додаст.
Дар ҷаласаи навбатии Раёсати Шӯрои уламои Маркази исломии Ҷумҳурии Тоҷикистон, ҳаҷму меъёри закот, садақаи Фитр ва фидяи савм низ муайян шудааст.
Ба иттилои манбаъ, мувофиқи ҳисоби шаръӣ нисоби закот 20 ҳазор сомонӣ муқаррар карда шудааст, ки аз он 500 сомонӣ закот дода мешавад.
Садақаи фитр ба ҳисоби гандум 5 сомонӣ ва ба ҳисоби мавиз 48 сомонӣ (барони онҳое, ки тавони бештари молӣ доранд) муайян гардидааст.
Фидяи савм барои соҳибони узри шаръӣ (шайхи фонӣ) ва бемороне, ки барои сиҳатшавиашон умеде нест, 300 сомонӣ барои 30 рӯз муайян карда шудааст.
Хатми Қуръони карим дар масҷидҳои кишвар тибқи имконоти мавҷуда дар ҳудуди як пора дар намозҳои таровеҳ гузаронида мешавад.
И.Тоҳир