Иқдоми “Аёдати Рамазонӣ” ҷамъбаст гардид

Дар Паёми табрикӣ ба ифтихори иди Рамазон Пешвои миллат муҳтарам Эмомалӣ Раҳмон таъкид намуданд: «Ҳар як инсони савобҷӯ метавонад дар арафаи иди саиди Фитр ва дар рӯзи ид то адои намоз хайри худро ба бародарону хоҳарон ва хешу таборони наздики ниёзманд, ҳамсояҳо, ятимону маъюбон, бепарасторон ва муҳтоҷон расонида, соҳиби савобу самараи дучанд гардад. Зеро тибқи фармудаҳои Қуръони маҷид ва пайғамбари ислом маҳз чунин шахсон ба қабули хайру садақа ҳақ доранд. Ҳамчунин, дар дини мубини ислом, бахусус дар байни пайравони мазҳаби ҳанафӣ саъю талош барои сулҳу оромии ҷомеа ва густариши инсофу адолат мақоми баланд дорад. Аз ин лиҳоз, ҳар як фарди мусулмон вазифадор аст, ки зиндагии худро бо эҳсонкориву хайрхоҳӣ ба сар барад, ростқавлу росткор, кушодадилу кушодачеҳра ва саховатпешаву ҳимматбаланд бошад ва ҳамеша аз аъмоли зишт, зулму ситам, хушунату зӯроварӣ ва қатлу ғорат канораҷӯӣ карда, ин амалҳои носавобу ғайриматлубро маҳкум намояд».

Ҷиҳати амалигардонии Барномаи пешазинтихоботии Ҳизби Халқии Демократии Тоҷикистон оид ба самти ҳифзи иҷтимоии аҳолӣ, иҷрои дастуру супоришҳои КИМ ҲХДТ ва ба муносибати моҳи шарифи Рамазон Кумитаи иҷроияи ҲХДТ иқдоми “Аёдати Рамазонӣ”-ро роҳандозӣ намуда, дар моҳи муборак аёдати оилаҳои маъюб, яккаву танҳо ва камбизоатро ба роҳ монд. Дар моҳи шарифи Рамазон аз ҷониби кумитаҳои иҷроияи ҲХДТ дар шаҳру ноҳияҳо, вакилон, саховатмандон ва ҷонибдорони ҳизб 5143 оилаҳои ниёзманд аёдат карда шуда, маводи ниёзи аввал дастрас карда шуд.