Дар Кемерово "Зимняя вишня"-ро аз байн мебаранд

Дар Кемерово рӯзи сешанбе ба тахриби бинои оташгирифтаи маркази тиҷории "Зимняя вишня" шуруъ карданд. Дар ин бора расонаҳо хабар медиҳанд.

Тасмим дар мавриди тахриби бино баъд аз чанд рӯзи оташсӯзӣ гирифта шуд, аммо ҷараёни тахриби бино танҳо имрӯз шуруъ гардид.

Сергей Сивилев, иҷрокунандаи вазифаи губернатори вилояти Кемерово мегӯяд, нахуст онҳо масъалаи ҷуброни саҳҳомони маркази тиҷориро ҳал карданд. "Ин ҷо се гуруҳи саҳҳомон ҳастанд: қисми асосӣ, ки онҳо аллакай аз даъвояшон гузаштанд, ду гуруҳи дигар, ки бо онҳо гуфтугӯ идома дорад", - гуфт Сивилев.

Ҳамаи харҷи тахриби биноро моликони маркази тиҷорӣ пардохт мекунанд.

Кумитаи тафтишотӣ ҳабси бинои "Зимняя вишня"-ро бекор кард, аммо пажуҳиш дар ҷои ҳодиса ҳанӯз тамом нашудааст.

Оташсӯзӣ дар маркази тиҷории мазкур 25 март рух дод. Бино бар иттилои расмӣ, дар ин ҳодиса 60 тан ҳалок шуданд, ки 40 нафарашон кӯдакон буданд. Мақомот гуфтанд, сабаби сӯхтор ба ҳам расидани ноқилҳои барқ буд. Дар доираи парвандаи сӯхтори бинои мазкур ҳашт гумонбар боздошт шуд.