Бегонапарастиро пешгирӣ ва либоси миллиро тарғиб мебояд!

ДУШАНБЕ, 25.07.2017. /АМИТ «Ховар»/ «Як гурӯҳи маҳдуди занону духтарон диндориро на дар ботин, балки дар зоҳир тасаввур карда, бо пӯшидани либосҳои сиёҳу торик арзишҳои фарҳанги миллии моро поймол ва фазои маънавии ҷомеаро тира сохта истодаанд». Ин нуктаро Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар мулоқот бо фаъолон ва аҳли ҷамоати кишвар бахшида ба 10-солагии амали Қонуни Ҷумҳурии Тоҷикистон «Дар бораи танзими анъана ва ҷашну маросимҳо дар Ҷумҳурии Тоҷикистон» таъкид намуда буданд.

Дар робита ба дастуру супоришҳои Пешвои миллат ва нақшаи чорабиниҳои муштараки Раёсати кор бо ҷавонон ва варзиш, Раёсати кор бо занон ва оилаи мақомоти иҷроияи ҳокимияти давлатии вилояти Хатлон, сохторҳои маҳаллии онҳо дар шаҳри Қӯрғонтеппа ва намояндаи шуъбаи Вазорати корҳои дохилии Ҷумҳурии Тоҷикистон дар шаҳр гурӯҳи таблиғотӣ ва фаҳмондаҳидӣ оид ба пешгирии пӯшидани либосҳои ба фарҳанги мо бегона таъсис дода шуда, дар тамоми маҳаллаҳои шаҳри Қӯрғонтеппа байни сокинон суҳбату вохӯрӣ ва корҳои фаҳмондадиҳӣ баргузор гардида истодаанд.

Вохӯриҳо аз 22 то 26-уми июл идома ёфта, зимни онҳо аз сокинони шаҳр даъват ба амал оварда мешавад, ки худогоҳиву хештаншиносӣ, эҳтиром ба арзишҳо ва фарҳанги миллиро пеша намуда, аз пайравӣ ба фарҳанги бегона худдорӣ намоянд.