Конференсия Идоракунии экологии замин

Кишвари мо дар баробари дигар минтақаҳои дунё, аз ҷумла Осиёи Марказӣ, ба тағйирёбии иқлим осебпазир маҳсуб меёбад. Тағйирёбии иқлим ба ҷамоатҳои деҳот, хоҷагиҳои деҳқонӣ, истифодабарандагони чарогоҳҳо, об, тамоми онҳое, ки бо кишоварзӣ машғуланд, хатари иловагӣ ба вуҷуд оварда, метавонад захираҳои заминро ба бодлесшавӣ, шусташавии қабати ҳосилхез, шӯршавӣ ва дигар дигаргуниҳои манфӣ мувоҷҷеҳ созад. Ин ҳама омилҳо боиси паст шудани ҳосилнокии замин, талафоти ҳосил, кам шудани даромаднокии кишоварзон, тарк намудани макони зист ва дар маҷмӯъ камбизоатӣ мегардад.
Бо мақсади пешгирии ин хатар, ҷорӣ кардани принсипҳои амниятии идораи захираҳои замин ва мутобиқшавӣ ба тағйирёбии иқлим, фароҳам овардани имкониятҳо ҷиҳати ғанигардонии сармояи истеҳсолии сокинони деҳот барои беҳтар намудани идоракунии захираҳои табиӣ ва баланд бардоштани қобилияти устуворӣ дар муқобили тағйирёбии иқлим, Кумитаи ҳифзи муҳити зисти назди Ҳукумати Ҷумҳурии Тоҷикистон бо дастгирии молиявии Бонки умумиҷаҳонӣ ва Фонди глобалии экологӣ шурӯъ аз соли 2013 дар чаҳорчӯбаи Барнома оид ба мутобиқшавӣ ба тағйирёбии иқлим (PPCR лоиҳаи «Идоракунии экологии замин ва беҳдошти воситаҳои зиндагӣ дар деҳот» (ELMARL) – ро амалӣ мегардонад.

Н. Худойбахшов