Ҷалби ҷавонон баҳри пойдории Ваҳдати миллӣ

Бо ташаббуси Асосгузори сулҳу Ваҳдати миллӣ - Пешвои миллат, Президенти Ҷумҳурии Тоҷикистон Муҳтарам Эмомалӣ Раҳмон эълон гардидани соли 2017 - «Соли ҷавонон» боиси ифтихору сарфарозии ҳар пиру барнои ноҳияи Деваштич гардидааст. Имрӯзҳо дар миқёси ноҳия дар асоси нақшаҳои алоҳида чорабиниҳои гуногуну рангини фарҳангию варзишӣ, маърифатию сиёсӣ баргузор гардида истодааст. Зеро аксарияти насли ҷавони ноҳия аз боварии Пешвои миллат руҳбаланд гардида, бо ташаббусу иқдомҳои тоза ба тоза рӯи саҳнаи созандагиву эҷодкорӣ устуворона қадам ниҳода истодаанду волидайни онҳо бо ифтихормандӣ ва шукронаи даврони соҳибистиқлоливу замони Ваҳдати миллӣ баҳри камолоти солеҳи фарзандони худ диққати аввалиндараҷа дода истодаанд. Чи тавре, ки Сарвари давлат зикр намудаанд: «Ҷавонон нерӯи солиму созандаи миллату давлат мебошанд» ва чи тавре, ки дар урфият мегӯянд: «Фарзанди нек боғи падар».
Имрӯз низ, баҳри хотирмон таҷлил намудани 20 солагии Рӯзи Ваҳдати миллӣ ва чун ҳамешагӣ такя намудан ба иқтидори бунёдкоронаву солими насли наврасу ҷавон, дар ноҳияи Деваштич тибқи нақша-чорабиниҳои Дастгоҳи Иҷроияи Президенти Ҷумҳурии Тоҷикистон баргузории мулоқоту суҳбатҳо бахшида ба Соли ҷавонон ва 20-солагии Рӯзи Ваҳдати миллӣ оғоз гардид. Мулоқоту суҳбатҳо бо иштироки оммаи васеъ ва қишрҳои гуногуни ҷомеа, бахусус ҷавонону бонувон барпо гардида, дар руҳияи самимияту идона ва бо намоиши барномаҳои фарҳангӣ баргузор шуда истодаанд.
Мулоқоти аввалин дар ҳудуди Ҷамоати деҳоти Яхтани ноҳияи Деваштич бо иштироки сокинону фаъолони деҳоти Яхтан, Хуштоири Мухлон, Хӯҷа Тоҳир, Бахт, Боғистон, Лолазор ва Даштикон барпо гардида, дар он Дилафрӯз Саидӣ - сарвари Донишкадаи политехникии Донишгоҳи техникии Тоҷикистон, Абдулло Ғафуров – мудири шӯъбаи Академияи илмҳои Ҷумҳурии Тоҷикистон, Фаррух Мақсудзода – сардори Раёсати тандурустии вилояти Суғд, Расулҷон Солиҷонов – профессори Донишкадаи иқтисод ва савдои Донишгоҳи тиҷорати Тоҷикистон, Иброҳим Ҷабборов – мудири кафедраи Донишгоҳи давлатии Хуҷанд ва Комрон Исмоилзода – раиси Кумитаи иҷроияи Ҳизби Халқии Демократии Тоҷикистон дар ноҳияи Деваштич маърӯзаю баромадҳои пурмуҳтаво ва самимӣ намуданд.

Вохӯриҳоро муовини Раиси ноҳияи Деваштич Бунафша Ғиёсиддинзода ифтитоҳ намуда, доир ба марому ҳадафҳои баргузорӣ ва дастовардҳои даврони соҳибистиқлоливу Ваҳдати миллӣ як ба як ҳарф зада, бори дигар муваффақиятҳои сокинони меҳнатқарини диёри зебоманзари ноҳияи Деваштичро хотирнишон намуд ва дар хотимаи суханронии хеш баён дошт, ки тамоми дастовардҳои ноҳия ин нишонаи ҷонибдории сиёсати сулҳпарваронаву ватандӯстонаи Роҳбари давлат мебошад.
Маърӯзачиён дар баромадҳои хеш аз пояндагиву пойдории Ваҳдати миллӣ, сулҳу оромӣ, суботи сиёсӣ, нақши Пешвои миллат дар эҳёи давлатдории навини тоҷикон, аз саҳми ҷавонон дар рушду инкишофи ояндаи дурахшони ҷомеаву давлат, аз дастовардҳои даврони истиқлолият, аз вазифаҳои дар пеш истода маърӯзаҳо намуда, бо аҳли ҷамъомадагон вохӯриву суҳбатҳои самимиро роҳандозӣ намуданд.
Сарвар Саидов
Роҳбари НТҶҶ «Созандагони Ватан» дар ноҳияи Деваштич