Мунтахаби Тоҷикистон бар тими Туркманистон пирӯз шуд

Дастаи мунтахаби футболи Тоҷикистон дар бозии байналмилалии дӯстона бар тими миллии Туркманистон бо ҳисоби 3:0 ғолиб шуд. Ин бозӣ 9-уми ноябр дар Варзишгоҳи марказии Душанбе дар доираи омодагии ҳарду даста ба мусобиқаи интихобии гуруҳии Ҷоми Осиё-2019, ки моҳи марти соли оянда оғоз меёбад, доир шуд.

Ҳар се голро Манучеҳр Ҷалилов зад. Дар ин бозии дӯстона дар ҳайати мунтахаби Тоҷикистон панҷ легионер – дарвозабон Абдуазиз Маҳкамов («Олой», Қирғизистон), ҳимоятгарон Искандар Ҷалилов («Дунав», Булғористон), нимҳимоятгарон Нуриддин Давронов («Дунав», Булғористон) ва Парвизҷон Умарбоев («Локомотив», Пловдив, Булғористон), инчунин ҳамлагар Ҷаҳонгир Эргашев («Динамо-Брест», Беларус) - бозӣ карданд.

Ин бозии ҳаштуми дастаҳои мунтахаби Тоҷикистону Туркманистон дар муддати 24 соли рақобати онҳо ба шумор мерафт. Се бозӣ бо пирӯзии футболбозони туркман анҷом ёфтааст. Дар се бозӣ футболбозони тоҷик ғолиб омадаанд ва ду бозӣ мусовӣ шудааст.

Мунтахаби Тоҷикистон дар доираи омодагиҳо ба мусобиқаи интихобии гуруҳии Ҷоми Осиё-2019 рӯзи якшанбеи 13-уми ноябр бо тими миллии Афғонистон бозии байналмилалии дӯстона анҷом медиҳад. Ин бозӣ дар Варзишгоҳи марказии Душанбе соати 16:00 шуруъ мешавад.