Гар дасти фитодае бигири мардӣ

Ҳукумати Ҷумҳурии Тоҷикистон бо сарварии Асосгузори сулҳу Ваҳдати миллӣ – Пешвои миллат Президенти Ҷумҳурии Тоҷикистон, Раиси муаззами ҳизб муҳтарам Эмомалӣ Раҳмон баҳри донишомӯзии мактаббачагон тамоми шароитҳоро фароҳам оварда истодааст.

Бо ин мақсад Кумитаи Иҷроияи Ҳизби Халқии Демократии Тоҷикистон дар шаҳри Ваҳдат ҷиҳати дастгирӣ намудани ятимону эҳтиёҷмандон аксияи «Мактаб-даргоҳи маърифат»-ро доир намуда, бахшида ба 25-солагии Истиқлолияти давлатии Ҷумҳурии Тоҷикистон дар соли хониши 2016-2017 ба 12 нафар ятимони эҳтиёҷманд маводҳои таълимӣ туҳфа намуд. Бояд ёдовар шуд, ки дар рафти туҳфасупорӣ ба мактаббачагони эҳтиёҷманд Фирўза Шарифӣ, мудири бахши кор бо занон ва ҷавонони дастгоҳи марказии ҲХДТ низ иштирок намуд.

Мавриди зикр аст, ки мактабу маориф яке аз соҳаҳои пешбарандаи ҷомеаи солими имрӯз аст. Даврони истиқлолият аст, ки насли навраси тоҷик дар мактабҳои замонавию бо техникаҳо муҷаҳҳазонидашуда, дар синфҳои барҳаво таълиму тарбия гирифта истодаанд. Ҳар як фарди солимро лозим аст, ки барои тарбияи насли наврас ҳиссагузор бошад.

Раиси муаззами ҳизб муҳтарам Эмомалӣ Раҳмон борҳо дар суханрониҳои худ таъкид кардаанд, ки насли наврас созандагони ҷомеаи солим ва ояндаи дурахшони миллат ҳастанд ва таълиму тарбияи онҳо вазифаи муқаддаси падару модар, ҷомеа ва давлат мебошад.