Натиҷагирӣ аз фаъолияти шашмоҳа

Дар маҷлиси васеъи ҳизбиён фаъолияти шашмоҳаи Кумитаи иҷроияи ҲХДТ дар ноҳияи Шаҳринав ҷамъбаст шуд. Нахуст раиси Кумитаи иҷроияи ноҳиявии ҳизб Абдуҷаббор Сатторов оиди фаъолияти кумитаи ноҳиявии ҳизб дар 6 моҳи соли равон ва вазифаҳои минбаъдаи ҳизбӣ гузориш дод. Мавсуф зикр намуд, ки дар ин давра аъзои ҳизб бо меҳнати эҷодкоронаи худ баҳри бунёди ҷомеаи адолатпарвар, давлати демократӣ, ҳуқуқбунёд ва дунявӣ саҳми арзанда гузошта, собит сохтанд, ки ҲХДТ воқеан ҳам ифодагари орзую омоли мардум, ҳизби ислоҳотҷӯй, ҳизби сулҳхоҳу ваҳдатпарвар буда, мақсади ниҳоии он бунёди ҷомеаи озод, Ватани обод ва давлати пешрафта мебошад. Бино ба маълумоти раиси комиҷроия дар ин давра 40 нафар ҷавонони болаёқат ба сафҳои ҲХДТ шомил гашта, ташкилотҳои нави ҳизбии «Ғунча» ва «Бонки Эсхата» таъсис дода шуд. Ҳамзамон зикр шуд, ки ташкилотҳои ҳизбии ноҳия дар баргузории тамоми чорабиниҳо ҳамеша пешсафанд.

Мудири шуъбаи маорифи ноҳия Мушаррафа Шарифова дар ҳошияи маърӯзаи раиси комиҷроияи ҳизб гуфт, ки таъмини имтиёзҳо, дастгирии ташаббусу пешниҳодҳо, фароҳам овардани шароити интихоби касбу ҳунар шумораи бештари занону ҷавононро водор сохтааст, ки ба ҳизби мо шомил гардида, барои расидан ба мақсадҳои оинномавии он саҳмгузор бошанд. Роҳбари дастгоҳи раиси ноҳия, узви КИМ ҲХДТ Ҳусейн Қудратӣ изҳор дошт, ки кумитаи иҷроияи ноҳиявии ҳизб ва ташкилотҳои ибтидоии он омода аст, дар оянда низ корҳои таблиғотиро баҳри сазовор истиқбол гирифтани маъракаи бузурги сиёсӣ ва давлатӣ, бахусус 25–солагии Истиқлолияти давлатии Ҷумҳурии Тоҷикистон пурзӯр намояд. Дар тақвияти маърӯзаи раиси кумитаи иҷроияи ноҳиявии ҳизб раиси ташкилоти ибтидоии ҳизбии «Табибон» М. Ғиёсова, раиси ҷамоати деҳоти «Боғистон» И. Беков ва мудири бахши кор бо ҷавонон, варзиш ва сайёҳии Мақомоти иҷроияи маҳаллии ҳокимияти давлатии ноҳия Б. Субҳонов андешаҳояшонро баён карданд.

Мудири шуъбаи кор бо занон ва ҷавонони Дастгоҳи Кумитаи Иҷроияи Марказии ҲХДТ Фирӯза Шарифӣ иброз дошт, дар марҳилаи навин яке аз вазифаҳои муҳими ташкилотҳои ҲХДТ пурзӯр гардонидани фаъолияти гурӯҳҳои таблиғотӣ аст. Аз ин рӯ мо вазифадор ҳастем, байни мардум рафта, зиндаги онхоро омӯзем ва дар ҳалли мушкилоташон ёрӣ расонем, ки ин обрӯ ва нуфузи ҳизбро баланд мебардорад. Дар охир барои таблиғу ташвиқи ғояҳои созандаи ҲХДТ, баланд бардоштани нуфузи он дар ҷомеа ва саҳми муносиб гузоштан дар маъракаҳои муҳими сиёсию ҳизбӣ Кумитаи иҷроияи ноҳия бо туҳфаи Дастгоҳи КИМ ҲХДТ сарфароз гардонида шуд. Ҳамзамон як гурӯҳ ҷавонон соҳиби шаҳодатномаҳои ҳизбӣ гардида, хизматҳои фаъолони ҳизб Ш. Саидзода, Ю.Ашӯров, М. Маҷидов, И. Беков, Р. Норов ва М. Қодиров бо Сипосномаҳои КИМ ҲХДТ қадр шуд.