АРҶГУЗОРИИ МАҚОМИ ЗАНОН

Бо ибтикори роҳбарияти ҲХДТ ҳамоиши занони барӯманди кишвар бахшида ба "РӮЗИ МОДАР " доир гашт. Ин анъанаи зебову шоистаро ҳамасола ин ҳизб идома медиҳад. Барои он масъулин ва муовинони ҲХДТ кӯшиш мекунанд беҳтарин толорҳоро интихоб кардаву беҳтарин дастурхон ороста, дастаҳои ҳунариро даъват мекунанд, то хотири модарону бонувони хидматкардаи халқу Ватанро шод бигардонанд.
Муовини аввали раиси ҲХДТ Абдуҷаббор Азизӣ ва муовини сарвазири Тоҷикистон Дилрабо Мансурӣ аз дастоварду муваффақиятҳои занон ёдовар гашта, табрикоти Раиси муаззами ҳизб- Президенти Ҷумҳурии Тоҷикистон - Пешвои маҳбуби миллат- Эмомалӣ Раҳмонро ба самъи ҳозирин расониданд.
Ин ҳама меҳрубониҳо гувоҳи эътибори зан- модар дар самти сиёсати пешгирифтаи Давлат ва роҳбарияти сиёсии он аст.
ҲХДТ чун ҳизби раҳбару раҳнамои эшон пайи амалӣ кардани ин бахши сиёсати давлатӣ ин анъанаро сол аз сол бештар ва хубтар амалӣ мекунад.
Муовинони раиси ҲХДТ Абдуҷаббор Азизӣ ва Хайринисо Юсуфӣ соҳибҷашнҳоро бо гулу мусиқӣ пешвоз гирифта буданд, новобаста аз ҳавои сард онҳо дар берун ба гусели занон бо кормандони Кумитаи иҷроия ҳизб худашон дар саф истода буданд. Яъне дар ин ҷашн занҳои зиёде аз қишрҳои гуногуни ҷомеа аз ҷониби ҲХДТ қадрдонӣ шуданду эътирофманд гаштанд.
Дар давоми чорабинӣ ҳамчунин ба хонаи пиронсолон ва интернатҳо низ маводи хӯрока, ошу ширинӣ фиристода шуд.
Ёдовар мешавем, ки маърака дар маҷмаъаи навбунёди "Дунёи ош" доир гашта буд.