ПЕШГИРӢ РОҲИ НАҶОТ АЗ БЕМОРӢ АСТ

Бо мақсади пешгирии бемории сироятии коронавирус, ки имрӯз ҷомеаи ҷаҳониро ба ташвиш овардааст, Кумитаи иҷроияи ҲХДТ дар вилояти Хатлон дар ҳошияи дастуру ҳидоятҳои роҳбарияти болоии ҳизб аксияеро бо номи “Ниқоб” дар ташкилоту муассисаҳо, кӯчаву хиёбонҳо ва назди бозорҳои шаҳри Бохтар бо ҷалби ихтиёриёни кумита доир кард.
Дар доираи ин тадбир ҳизбиён ниқобҳои муҳофизатӣ ва маводҳои иттилоотиро, ки истифодаи онҳо дар пешгирии бемории сироятии болозикр мусоидаткунанда мебошад, ба Ҷамъияти нобиноён ва Ҷамъияти маъюбон дастрас карданд. Чунин афрод, ки ниёз ба кумак доранд, аз иқдоми пешгирифтаи Кумитаи иҷроия ҲХДТ дар вилояти Хатлон изҳори қаноатмандӣ намуданд.
Масъулони ҷамъиятҳои мазкур қайд доштанд, ки дар шароити имрӯз воқеан ҳам ба чунин маводҳо ниёз доштанд.
Ихтиёриён (волонтиёрон) дар ҳамдастӣ бо кормандони ҳизб барои тақсимоти ниқоби муҳофизатӣ ва маводҳои иттилотӣ ба кӯчаву хиёбонҳо, аз ҷумла, назди бозорҳои “Фаровон” ва “Ҳоҷӣ Шариф”-и шаҳри Бохтар сафарбар шуда, ба онҳое, ки бидуни ниқоб гаштугузор мекарданд, маводҳои болозикрро дастрас карданд. Дар баробари ин бо истифода аз имконияти мусоид ҳизбиён оид ба хатари бемории коронавирус ва зарурати риояи дурусти гигенаи шахсӣ маълумот доданд. Дар умум тариқи ин аксияи ҳизбӣ санаи 8-уми май дар шаҳри Бохтар беш аз 300 ниқоб тақсим карда шуд.
Дар ин рӯз дар доираи чунин чорабиниҳо бо ташаббуси Кумитаи иҷроияи шаҳрии ҲХДТ маҳаллаи “Дӯстӣ”-и шаҳри Бохтар бо маҳлули хлор безарар гардонида шуд. Зимни роҳандозии ин тадбир сокинони маҳалла фаъолона иштирок карданд.
Кумитаи иҷроияи ҲХДТ дар вилояти Хатлон пайваста баҳри болоравии иттилоотнокии мардум чораҳои зарурӣ андешида, оид ба дастгирии табақаи ниёзманд минбаъд низ тадбирҳои муассирро амалӣ хоҳад кард.