Коре бо таҳсин ва хайре ибрат бин

Бахшида ба 71-уми солгарди таҷлили Рӯзи Ғалаба кормандони Кумитаи иҷроияи ҲХДТ дар шаҳри Душанбе бо сарварии Раиси Кумита Ҷамшед Саидов ба дидорбинии сокини ноҳияи Фирдавсии пойтахт, маҳаллаи «Наврӯз» Ороста Назарова, ки шавҳараш иштирокчии Ҷанги Бузурги Ватанӣ аст, рафтанд.

Дар ин боздид Ҷамшед Саидовро Заррина Зуҳурова, мудири шуъбаи кор бо занон ва бонувон ва Қунбонгул Қурбонмамадова, мудири шуъбаи таблиғоти КИ ҲХДТ дар шаҳри Душанбе ҳамроҳӣ карданд. Бояд ёдрас кард, ки дар ин асно ба аҳли байти иштирокчии ҶБВ маҳсулоти ниёзи аввал, аз қабили орд, шакар, равған, биринҷ ва дар шакли молиявӣ кумак расонида шуд. Баъд аз ин, миёни кормандони ҳизб ва оилаи манзур суҳбати хубу хотирмон сурат гирифт. Дар охир ин зани рӯзгордида ба хотири боз ҳам ободу зебо гаштани Ватани азизамон даст ба дуо бардошта, аз Худованд талаби сулҳу субот ва хотирҷамъии мардуми сарзаминамонро кард.

Сипас, масъулин ба маҳаллаи «Фирӯз»-и ноҳияи Исмоили Сомонӣ ба дидорбинии Мисқо Ҳамдамова, ки дар дар ҶБВ дар ақибгоҳ иштирок доштааст, равон гаштанд. Зани рӯзгордида меҳмононро тоҷикона истиқбол карда, ба хонаи худ таклиф намуд. Дар манзили ин зани 86-сола суҳбати хотирмони ҳизбиён бо Мисқо Ҳамдамова доир гардид. Дар ин миён раиси КИ ҲХДТ дар ноҳияи Исмоили Сомонӣ Умринисо Казакова низ ҳузур дошт. Дар охир ин зан-модар барои ғамхориҳо ба масъулин изҳори сипос намуда, таманнои шукуфоӣ ва ободии Тоҷикистони азизро кард. Бояд гуфт, ки ба ин зан ҳам имдодҳои пулию молиявӣ расонида шуд. Дар маҷмӯъ, иқдоми нек аст, ки кормандони Кумитаи иҷроияи ҲХДТ дар шаҳри Душанбе дар арафаи идҳои гуногун ба шахсони ниёзманд дасти мадад дароз намуда, ниёзмандонро аз ҷиҳати моддию маънавӣ дастгирӣ менамоянд.
Ш. Олимӣ