Моҳи апрел Намоишгоҳи байналмилалии молҳо ва хизматрасониҳо барои саломатӣ ва зебоӣ баргузор мешавад

Аз 23 то 25 апрел дар шаҳри Душанбе Намоишгоҳи байналмилалии молҳо ва хизматрасониҳо барои саломатӣ ва зебоӣ баргузор мешавад. Дар ин хусус Раиси Палатаи савдо ва саноати Ҷумҳурии Тоҷикистон Фарҳодшо Раҳмонализода 5 феврал зимни нишасти матбуотӣ ба хабарнигорон иттилоъ дод.

Иброз шуд, ки намоишгоҳ дар доираи ҳадафи чоруми стратегии миллӣ – саноаткунонии босуръати мамлакат бо дастгирии Ҳукумати Ҷумҳурии Тоҷикистон гузаронида мешавад. Мақсади он муаррифӣ намудани молу маҳсулоти ширкатҳои ватанӣ ва баланд бардоштани сатҳи сифатнокии он мебошад.

Дар назар аст, ки дар намоишгоҳ маҳсулоти косметикӣ, таҷҳизоти косметологӣ, маҳсулоти нигоҳубин ва гигиенӣ, витаминҳо, ғизои варзишӣ, истеҳсоли таҷҳизоти тиббӣ, маҳсулоти дорусозӣ, таҷҳизоти лабораторӣ, таҷҳизоти дорусозӣ, лабораторӣ, тиббӣ, ташхисӣ, технологияҳо ва таҷҳизоти коркарди гиёҳҳо, асбоби тиббӣ, доруҳои тайёр, маҳсулоти ортопедӣ ва протезҳо аз ҷониби ширкатҳои ватанию хориҷӣ ба намоиш ва фурӯш гузошта шаванд.

Муаррифии молу маҳсулот дар чунин намоишгоҳҳо ба боз ҳам беҳтар гардидани робита байни истеҳсолкунанда ва истеъмолкунанда мусоидат намуда, барои таъмини аҳолии мамлакат бо дору, молҳои тиббии дорои сифати ҷаҳонӣ ва аз ҷиҳати иқтисодӣ дастрас заминаи мусоид мегузорад.