Нақши тоҷикон дар ташаккул ва рушди Роҳи бузурги Абрешим дар Душанбе баррасӣ шуд

Роҳи бузурги Абрешим роҳи ҳамгироӣ, мубодила ва муколамаи Шарқу Ғарб маҳсуб шуда, беш аз ду ҳазор сол дар пешрафт ва шукуфоии тамаддуни башарӣ саҳми арзанда гузоштааст. Чунин гуфта шуд дар конфронси илмӣ-назариявӣ, ки дар Осорхонаи миллии Тоҷикистон таҳти унвони «Нақши тоҷикон дар ташаккул ва рушди Роҳи бузурги Абрешим» баргузор гардид.

Осорхонаи миллии Тоҷикистон иттилоъ медиҳад, ки конфронс ба воридшавии ёдгориҳои фарҳангии умумиҷаҳонии фаромилии Роҳҳои Абрешим ба феҳристи мероси ҷаҳонии ЮНЕСКО бахшида шуда, дар он директори Осорхонаи миллӣ Зафаршо Иброҳимзода, акдемики Академияи миллии илмҳои Тоҷикистон Юсуфшоҳ Яъқубов, устодони Донишгоҳи миллии Тоҷикистон ва Донишгоҳи давлатии омӯзгории Тоҷикистон ба номи С. Айнӣ сухан намуданд.

Тавассути Роҳи бузурги Абрешим, ки роҳи корвонгузар буд ва аз Чин ба воситаи Осиёи Миёна то ба Рум тӯл мекашид, тиҷорат ва робитаҳои мутақобили фарҳангӣ амалӣ мешуд. Ин аст, ки аҷдодони тоҷикон давоми чандин асрҳо пуштибонони асосии ин роҳ маҳсуб мешуданд.

Дар конфронс олимону донишмандон дар мавзуъҳои «Асосгузорони Роҳи бузурги Абрешим», «Муҳоҷирати тахориҳо дар Роҳи Абрешим», «Дипломатияи абрешимӣ чун асоси ташаккул ва фаъолияти Роҳи бузурги Абрешим», «Қалъаҳои Помир ва пайванди онҳо бо Роҳи Абрешим» ва «Мақоми роҳҳои тиҷоратӣ дар замони Ҳахоманишиҳо» маърузаи илмӣ карданд.

Дар анҷоми конфронс иштирокдорон доир ба мавзуи «Нақши тоҷикон дар ташаккул ва рушди Роҳи бузурги Абрешим» табодули назар намуданд.