ҲАЁТИ ҲИЗБ

17-уми май дар Донишгоҳи давлатии Кӯлоб ба номи Абуабдуллоҳи Рӯдакӣ бо ибтикори Кумитаи Иҷроияи Марказии Ҳизби Халқии Демократии Тоҷикистон бахшида ба 30-солагии таъсисёбии Ҳизби Халқии Демократии Тоҷикистон, 30-солагии Конститутсияи Ҷумҳурии Тоҷикистон конфронси 4-уми байналмилалии илмӣ-амалӣ таҳти унвони “Мактаби сиёсии Пешвои миллат” баргузор гардид.
Пеш аз оғози конфронс истиқболи меҳмонон бо гузоштани гулчанбар дар назди пайкараи “Дасти дуои модар” оғоз гардид. Ҳамчунин, дар даромадгоҳи бинои маъмурии Донишгоҳи давлатии Кӯлоб иштирокчиёни конфронс бо намоиши асарҳои Президенти Ҷумҳурии Тоҷикистон муҳтарам Эмомалӣ Раҳмон ва дастовардҳои илмӣ-таҳқиқотии устодону омӯзгорон шинос шуданд.
Қисми расмии конфронс дар толори асосии Донишгоҳ баргузор гардид, ки дар он ҳайати меҳмонон зери раёсати муовини якуми Раиси Ҳизби Халқии Демократии Тоҷикистон Абдуҷаббор Азизӣ, муовини Сарвазири Ҷумҳурии Тоҷикистон Дилрабо Мансурӣ, муовини раиси вилояти Хатлон Анзурат Абдусаломзода, ректори Донишгоҳи миллии Тоҷикистон Эмомалӣ Насриддинзода, директори Маркази исломшиносӣ дар назди Президенти Ҷумҳурии Тоҷикистон Абдураҳим Холиқзода, Раиси шаҳри Кӯлоб Бахтиёр Назарзода иштирок ва суханронӣ карданд. Ҳамчунин, дар кори конфронс ректорони муассисаҳои таҳсилоти олии касбии кишвар, олимону муҳаққиқон ва коршиносони сиёсӣ аз донишгоҳу донишкадаҳо, Академияи миллии илмҳо ва академияҳои соҳавӣ, кормандони дастгоҳи Кумитаи Иҷроияи Марказии ҲХДТ, раисони кумитаҳои иҷроияи ҲХДТ дар шаҳру ноҳияҳои вилояти Хатлон, раисони ташкилотҳои ибтидоии ҳизбӣ ва дигар фаъолони ҳизб иштирок доштанд.
Аз донишгоҳҳои Федератсияи Россия тариқи фосилавӣ олимону муҳаққиқон бо баромадҳои алоқаманд суханронӣ карданд. Илова бар ин, намояндаи Сафорати Федератсияи Россия дар Ҷумҳурии Тоҷикистон Кутсук Тайсаев дар кори конференсия тариқи фосилавӣ иштирок намуд.
Дар қисмати расмии конференсия муовини Сарвазири Ҷумҳурии Тоҷикистон Дилрабо Мансурӣ, муовини раиси вилояти Хатлон Анзурат Абдусаломзода ва раиси шаҳри Кӯлоб Бахтиёр Назарзода сухани ифтитоҳӣ карданд.
Иброз гардид, ки илм поягузори рушди устувор, самаранокӣ дар иқтисодиёту истеҳсолот, пойдорӣ дар муносибатҳои ҷамъиятӣ ва комгорӣ дар сиёсату маънавиёт арзёбӣ мешавад. Дар ҷаҳони муосир собит гардидааст, ки ҳар ҷое амалия ба илм тавъам аст, он ҷо рушд ва пешрафту комёбиҳо назаррас мебошанд.
Пешвои миллат, Раиси муаззами Ҳизби Халқии Демократии Тоҷикистон муҳтарам Эмомалӣ Раҳмон дар яке аз суханрониҳои хеш баён намуданд: “Баланд бардоштани маҳорати касбии роҳбарон, истифодаи ҳаматарафаи натиҷаҳои илмию таҳқиқотӣ дар раванди истеҳсолот, васеъ намудани фаъолияти инноватсионӣ, ҳамкории давлат бо бахши хусусӣ, пайвастагии илм ва истеҳсолот ва дигар чораҳо муҳим мебошанд”.
Ҷалби олимону муҳаққиқон ба коркарди илмии татбиқи ҳадафҳои барномавии ҲХДТ имкон медиҳад, ки нишондиҳандаҳои муайяншуда сари вақт, суроғавӣ, пурмаҳсул ва устувор дастёб гарданд; мактаби илмии Ҳизби Халқии Демократии Тоҷикистон ташаккул ёфта, кадрҳои болаёқат аз лиҳози идеологӣ омодагашта ба таҳкими иқтидори илмии мактаби сиёсии Пешвои миллат ба роҳ монда шуда, механизмҳои муосири рушди устувори асосҳои институтсионалии мамлакат ташаккул дода мешаванд.
Зимнан, бо мақолаҳои таҳлилию илмӣ муовини якуми Раиси Ҳизби Халқии Демократии Тоҷикистон Абдуҷаббор Азизӣ, муовини якуми вазири маориф ва илми Ҷумҳурии Тоҷикистон Ҷамшед Ҷӯразода. директори Маркази исломшиносӣ дар назди Президенти Ҷумҳурии Тоҷикистон Абдураҳим Холиқзода, ноиби Президенти Академияи миллии илмҳои Тоҷикистон Маҳмаддовуд Саломиён, ректори Академияи идоракунии давлатии назди Президенти Ҷумҳурии Тоҷикистон Даврон Сафарзода, ректори Донишгоҳи давлатии Кӯлоб ба номи Абуабдуллоҳи Рӯдакӣ Дилшод Раҳмон Дилшод, роҳбари дирексияи барномаҳои таҳсилоти иловагии Донишгоҳи давлатии иҷтимоии Россия Александр Соломатин (тариқи фосилавӣ), досенти кафедраи сиёсатшиносии муқоисавии Донишгоҳи давлатии Москва Даниил Популях ва омӯзгори муассисаи таълимии Россия-Тоҷикистон Мария Прокопенко суханронӣ карданд.
Нотиқон зимни ироаи маърузаҳои илмӣ таъкид доштанд, ки дар саҳифаҳои таърихи давлатдории миллӣ санаҳои пурарзиш ва сабақомӯзе ҳастанд, ки аз ояндаи нек башорат медиҳанд ва мардумро ба амалӣ намудани ташаббусҳои шоиставу ифтихорӣ ҳидоят менамоянд.
Маҳз ҳамин садоқату ифтихор заминаи устувори марҳилаи рушду пешрафт ва таъмини таҳкими пояҳои давлатдории миллӣ арзёбӣ гардида, дар саргаҳи амалӣ намудани ҳадафҳои созанда ташаббусҳои сатҳи баланд ва шоистаи таҳсини Пешвои миллат, Раиси муаззами Ҳизби Халқии Демократии Тоҷикистон муҳтарам Эмомалӣ Раҳмон нақши меҳварӣ доранд.
Ҳизби Халқии Демократии Тоҷикистон, ки дар заминаи мақсаду аҳдофи сиёсии оинномавӣ фаъолияти худро шарафмандона амалӣ карда истодааст, ҷиҳати мусоидат ба таъмини сулҳу субот дар ҷомеа, рушди самтҳои муҳимми иқтисодиёту иҷтимоиёт, маорифу фарҳанг, тандурустӣ ва тарғиби афкори миллии иҷтимоӣ корҳои назаррасро анҷом дода истодааст.
Дар ин марҳилаи пурмаҳсул аъзо ва ҷонибдорони ин ҳизби пешсаф зери шиори “Барои пешрафт ва зиндагии шоистаи мардум” садоқати худро ба арзишҳои умумимиллӣ, соҳибихтиёрӣ ва рушди минбаъдаи давлатдорӣ равона карда, бо мақсади муҳайё намудани сатҳу сифати арзандаи зиндагии аҳолӣ фаъолияти назарраси худро дар тамоми самтҳои муҳимми хоҷагии халқи кишвар таҳким бахшида истодаанд.
Бо мақсади тақвияти рукнҳои илмӣ-назариявии фаъолият ва ҳадафҳои барномавии Ҳизби Халқии Демократии Тоҷикистон ҳамчун мактаби сиёсӣ, ҳамзамон, дастовардҳои сиёсии Ҳукумати Ҷумҳурии Тоҷикистон дар давраи 30-соли Истиқлоли давлатӣ Кумитаи иҷроияи Ҳизби Халқии Демократии Тоҷикистон дар вилояти Хатлон мунтазам конфронси байналмилалии илмӣ-назариявии “Мактаби сиёсии Пешвои миллат” баргузор карда мешавад.
Иттилоъ дода шуд, ки конфронси мазкур маротибаи чорум аст, ки бо мақсади таҳким бахшидани рукнҳои илмӣ-амалии фаъолият ва ҳадафҳои барномавии Ҳизби Халқии Демократии Тоҷикистон ҳамчун мактаби сиёсӣ, ҳамзамон дастовардҳои сиёсии Ҷумҳурии Тоҷикистон дар давраи Истиқлоли давлатӣ ҳамчун идомаи мантиқии конференсияҳои гузашта доир мегардад.
Ин конфронси илмӣ соли 2020 дар шаҳри Бохтар (дар ҳамкорӣ бо Донишгоҳи давлатии Бохтар) бо иштироки 50 олимону муҳаққиқон, 6-уми октябри соли 2021 дар ҳамкорӣ бо Донишгоҳи давлатии Данғара дар ноҳияи Данғара бо иштироки 150 нафар олимону муҳаққиқон ва 24-уми июни соли 2022 дар ҳамкорӣ бо Донишкадаи энергетикии Тоҷикистон бо иштироки 67 нафар олимону муҳаққиқони донишгоҳҳо ва донишкадаҳо, Академияи миллии илмҳо ва академияҳои соҳавии ҷумҳурӣ баргузор шуданд.
Конференсияи навбатӣ дар ҳамкорӣ бо Донишгоҳи давлатии Кӯлоб ба номи Абуабдуллоҳи Рӯдакӣ дар шакли мустақим ва фосилавӣ (онлайн) доир гардид, ки дар он 140 нафар олимон, муҳаққиқон, ходимони сиёсӣ аз мактабҳои олии шаҳру ноҳияҳои Душанбе, Хуҷанд, Кӯлоб, Данғара ва хориҷи кишвар, аз ҷумла аз Федератсияи Россия иштирок карда, дар он 140 мақолаи илмӣ мавриди баррасӣ ва омӯзиш қарор дода мешавад.
Дар анҷоми қисми пленарии конфронс ба як қатор фаъолон ва олимону муҳаққиқон сипоснома супорида шуд.
Кори конфронс қисмати дуюми рӯз дар панҷ бахш: “Сиёсатшиносӣ ва идоракунӣ”, “Иқтисодиёт ва энергетика”, “Ҳуқуқ, амнияти миллӣ ва муносибатҳои байналмилалӣ”, “Маориф ва илм”, “Кишоварзӣ ва саноатикунонӣ” идома ёфт.


20-уми майи соли ҷорӣ бахшида ба 23-юми май - “Рӯзи ҷавонони Тоҷикистон” бо ибтикори ташкилоти ибтидоии ҳизбии “Мутриб”-и Консерваторияи миллии Тоҷикистон чорабинии бошукӯҳи идона зери унвони “Дунё пур аз ҷавонӣ” баргузор гардид.
Дар ҳамоиши мазкур раиси Кумитаи иҷроияи ҲХДТ дар ноҳияи Шоҳмансур Нилуфар Каримзода, муовини якуми раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон Шабнам Раҳимзода, муовини ректори Консерваторияи миллии Тоҷикистон Саъдулло Каримзода, ҳунармандони саршиноси санъати тоҷик Саидқул Билолов ва Баҳодур Неъматов, аъзои фаъоли ҳизб, донишҷӯён ва ҷавонону наврасони фаъолу хушиқболи зодаи даврони соҳибистиқлолии кишвар ширкат варзиданд.
Дар қисмати муқаддимавии чорабинӣ раиси Кумитаи иҷроияи ҲХДТ дар ноҳияи Шоҳмансур Нилуфар Каримзода, муовини якуми раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон Шабнам Раҳимзода ва муовини ректори Консерваторияи миллии Тоҷикистон Саъдулло Каримзода суханронӣ намуда, аз ҷумла зикр карданд, ки имрӯз ҷавонони мо такягоҳи воқеӣ, умед ва ифтихори ҷомеа ва давлати Тоҷикистон ба шумор мераванд.
Ватанро сидқан ва самимона дӯст доштан, бо он ифтихор кардан, барои ҳимояи он омода будан, ба қадри истиқлолу озодӣ, сулҳу оромӣ, суботи сиёсӣ ва ваҳдати миллӣ расидан, эҳтироми падару модарро ба ҷо овардан аз ҷумлаи арзишҳое мебошанд, ки ҳар кадоме аз ҷавонони мо бояд ин арзишҳоро дастури зиндагии ҳаррӯзаи худ қарор диҳанд.
Барои ҷомеаи Тоҷикистон басо хушоянд аст, ки дар мамлакат як рӯзи махсусро ҳамчун “Рӯзи ҷавонони Тоҷикистон” бо як шукӯҳи хоса ҷашн мегиранд ва таҷлили ҳамасолаи “Рӯзи ҷавонони Тоҷикистон” дар сатҳи баланди ҷамъиятиву сиёсӣ шаҳодати ғамхориҳои пайвастаи Пешвои миллат муҳтарам Эмомалӣ Раҳмон ва давлату Ҳукумат нисбат ба насли ҷавони кишвар мебошад, қайд гардид дар идомаи суханрониҳо.
Дар ин радиф, ба як гурӯҳ кормандони Консерваторияи миллии Тоҷикистон, ки қаблан ҷиҳати ба сафи ҲХДТ қабул гардиданашон ариза ва маълумотномаҳои худро пешниҳод карда буданд, шаҳодатномаҳои ҳизбӣ супорида шуданд. Инчунин, як гурӯҳ фаъолон бо ифтихорномаву сипосномаҳо қадрдонӣ гардиданд.
Дар идомаи ҳамоиш аз ҷониби ҳунармандон ва донишҷӯёни Консерваторияи миллии Тоҷикистон барномаи зебои фарҳангӣ пешкаши иштирокчиёни ҳамоиш гардонида шуд.



Ҳамасола дар тамоми гӯшаю канори ҷумҳурӣ бахшида ба “Рӯзи ҷавонони Тоҷикистон” Дави миллӣ баргузор мегардад.
Бо ин мақсад дар маркази маъмурии Вилояти Мухтори Куҳистони Бадахшон - шаҳри Хоруғ бо иштироки аъзои фаъоли Ҳизби Халқии Демократии Тоҷикистона бо иштироки раиси вилоят Алишер Мирзонабот, раиси шаҳри Хоруғ Ризо Назарзода, сардорони сохторҳои қудратӣ, кормандони ташкилоту муассисаҳои шаҳру вилоят, ҷавонону наврасон, занону собиқадорон, сокинони шаҳр, аз ҷумла раисон ва кормандони Кумитаи иҷроияи Ҳизби Халқии Демократии Тоҷикистон дар Вилояти Мухтори Кӯҳистони Бадахшон ва шаҳри Хоруғ Дави миллӣ ва марафони велосипедронӣ баргузор гардид.
Чорабинӣ бо садо додани Суруди миллӣ оғоз гардида, раиси вилоят Алишер Мирзонабот тамоми иштирокдоронро ба ифтихори қабул гардидани қатъномаи Маҷмаи Умумии Созмони Милали Муттаҳид оид ба эълон намудани 25-уми май ҳамчун “Рӯзи ҷаҳонии футбол”, ки аз ҷониби Президенти Ассотсиатсияи футболи Осиёи Марказӣ, Президенти Федератсияи футболи Тоҷикистон муҳтарам Рустами Эмомалӣ пешниҳод шуда буд, самимона табрик гуфта, зикр кард, ки бори нахуст соли 1993 дар таърихи давлати мо новобаста аз вазъи мураккаби сиёсию иқтисодӣ бо мақсади ба ҳам овардани миллати тоҷик аз ҷониби ҳаракати олимпии кишвар Дави олимпӣ баргузор гардид ва ин чорабинӣ минбаъд ба таври оммавӣ дар саросари кишвар идома пайдо кард.
Ҳукумати Тоҷикистон аз рӯзҳои аввали соҳибистиқлолӣ зери роҳбарии Пешвои миллат, Раиси муаззами Ҳизби Халқии Демократии Тоҷикистон муҳтарам Эмомалӣ Раҳмон тарбияи ҷисмонӣ ва таҳкими тарзи ҳаёти солимро дар меҳвари сиёсати иҷтимоии худ қарор додааст. Пас аз табрикоти раиси вилоят марафони велосипедронӣ ва Дави оммавӣ бо эълони доварон оғоз гардид.
Дар ибтидо велосипедронҳо ҳамоишро оғоз бахшида, сипас, кормандони мақомоти иҷроияи ҳокимияти давлатии вилоят ва шаҳр, ташкилоту муассисаҳо, инчунин, сокинон бо эълони доварон ба давидан шуруъ намуданд.
Дави миллӣ ва марафони велосипедронӣ аз майдони Исмоилӣ Сомонӣ шуруъ шуда, дар назди “Боғи Ғалаба”-и шаҳри Хоруғ ҷамъбаст гардид.



Дар доираи амалӣ намудани нақшаи чорабиниҳо ба истиқболи сазовори 30-солагии таъсисёбии Ҳизби Халқии Демократии Тоҷикистон ва ба ифтихори “Рӯзи байналмилалии осорхонаҳо” бо иқдоми Кумитаи иҷроияи ҲХДТ дар шаҳри Конибодом чорабинии фарҳангӣ таҳти унвони «Ҳунарманд ҳар ҷо бувад сарфароз" дар Осорхонаи таърихӣ- кишваршиносии ба номи Мирраҷаб Додхоҳ бо иштироки ҳунармандон, фаъолони ҲХДТ, хатмкунандагони муассисаҳои таълимӣ ва қишри гуногуни ҷомеа доир гардид.
Мақсад аз баргузории чорабинии мазкур рушди ҳунарҳои мардумӣ, арҷгузорӣ ба арзишҳои миллӣ, ҳавасманд гардонидани ҳунармандон ва ҷалби ҷавонон ба ҳунару ҳунаромузӣ буд.
Сараввал, директори осорхона меҳмонони ҷашнвораро пазироӣ намуда, аз таъриху тамаддуни бою пурғановати шаҳр, ёдгориҳои бостонӣ ва мероси гаронарзиши ниёгон маълумот дод.
Сипас, маҳорати ҳунарии ҳунармандон - аъзои фаъоли ҲХДТ муаррифӣ гардида, аз кору офаридаҳои дастии онҳо иттилои муфассал дода шуд. Ҳамчунин, раиси Кумитаи иҷроияи ҲХДТ дар шаҳри Конибодом Фирӯза Шерматова зимни суханронии хеш ҳадафи чорабиниро андешидани тадбирҳо дар самти татбиқи ҳадафҳои созандаи Ҳизби Халқии Демократии Тоҷикистон арзёбӣ намуда, нақши ҳунармандонро дар ҳифзи фарҳангу тамаддуни миллати тоҷик калидӣ маънидод кард.
Муовини раиси шаҳр Гулчеҳра Раҳмонзода ҳамагонро ба муносибати “Рӯзи байналмилалии осорхонаҳо” табрик гуфта, ҳамзамон чунин иқдомро баҳри ҷалби ҷавонон ба ҳунаромузӣ ва ҳавасмандгардонии ҳунармандон саривақтӣ шуморид ва дар ин радиф ба онҳо такмили маҳорати ҳунарварӣ таманно намуд.
Дар қисмати қадршиносии ҳунармандон аз ҷониби Кумитаи иҷроияи ҲХДТ дар шаҳри Конибодом ба даҳ нафар ҳунармандони фаъоли шаҳр сипоснома ва туҳфаҳои хотиравӣ тақдим гардид.


Саҳми варзиш, ки дар меҳвари асосии сиёсати Ҳукумати Тоҷикистон қарор дорад, дар раванди фаъолияти ҲХДТ низ яке аз соҳаҳои калидии он ба шумор меравад. Дар ин доира, барои боз ҳам тақвият бахшидани соҳаи варзиш аз ҷониби Кумитаи иҷроияи ҲХДТ дар ноҳияи Кӯшониён барои дарёфти Ҷоми ҲХДТ, мусобиқаи футбол доир гардида истодааст.
Тибқи Низомнома оид ба баргузор намудани мусобиқаи ҷумҳуриявӣ барои дарёфти “Ҷоми Ҳизби Халқии Демократии Тоҷикистон” бахшида ба 30-солагии таъсисёбии ҲХДТ мусобиқаи футбол байни дастаҳои кормандони ташкилотҳои ибтидоии ҳизби КДФ “БММҒ” дар майдончаи варзишии Ҷамоати шаҳраки Исмоили Сомонӣ баргузор гардида, дар мусобиқа намояндагони Кумитаи иҷроияи ҲХДТ дар ноҳияи Кӯшониён, устодон ва варзишгарон иштирок карданд.
Мақсад аз баргузории чунин мусобиқа ташвиқу тарғиби ҳаёти солим ва ҷалби шаҳрвандони мамлакат ба машғулияти тарбияи ҷисмонӣ ва варзиш, ташвиқу таблиғи васеи бозии футбол дар байни аҳолии кишвар, мустаҳкам намудани алоқаи дӯстӣ, таъмини бевоситаи иҷрои “Барномаи рушди футбол дар Ҷумҳурии Тоҷикистон барои солҳои 2022-2026” ва Барномаи махсуси Президенти Ҷумҳурии Тоҷикистон “Дар бораи рушди футбол дар деҳоти Ҷумҳурии Тоҷикистон барои солҳои 2021-2024”, барномаи пешазинтихоботии ҲХДТ барои солҳои 2020-2025, таъмини фароғати мадании шаҳрвандон, муайян намудани дастаҳои футболи ғайрикасбии Ҷумҳурии Тоҷикистон мебошад.


Бо мақсади ҳамовозӣ аз қабули пешниҳоди Президенти Ассотсиатсияи Футболи Осиёи Марказӣ (CAFA), Президенти Федератсияи футболи Тоҷикистон муҳтарам Рустами Эмомалӣ оид ба расман эълон гардидани “Рӯзи ҷаҳонии футбол” аз ҷониби Созмони Милали Муттаҳид тибқи нақшаи кории Кумитаи иҷроияи ҲХДТ дар шаҳри Хуҷанд бахшида ба “Рӯзи ҷавонони Тоҷикистон” дар Муассисаи давлатии мактаби варзишии №2-и шаҳри Хуҷанд ҳамоиши варзишгарон баргузор гардид.
Дар кори ҳамоиш мушовири раиси Кумитаи иҷроияи ҲХДТ дар вилояти Суғд Наим Маликисломӣ, роҳбари дастгоҳи Кумитаи иҷроияи ҲХДТ дар шаҳри Хуҷанд Маҳмадсалим Ҳаитов ва роҳбари намояндагии Ташкилоти ҷамъиятии ҷавонон “Созандагони Ватан”-и шаҳр Эҳсонҷон Исоев иштирок карданд.
Зимни мулоқот бо варзишгарони наврас мушовири раиси Кумитаи иҷроияи ҲХДТ дар вилояти Суғд Наим Маликисломӣ аз номи раиси Кумитаи иҷроияи ҲХДТ дар вилояти Суғд Мирзоқосим Каримзода кулли варзишгаронро бо пазируфта шудани ташаббуси Президенти Ассотсиатсияи футболи Осиёи Марказӣ (CAFA), Президенти Федератсияи футболи Тоҷикистон муҳтарам Рустами Эмомалӣ оид ба расман эълон гардидани “Рӯзи ҷаҳонии футбол” ва “Рӯзи ҷавонони Тоҷикистон” таҳният гуфт.
Мавсуф аз тадбирҳои Ҳукумати Ҷумҳурии Тоҷикистон дар самти рушди варзиш ва тарбияи ҷисмонӣ ёдовар шуда, аз ҷавонон даъват ба амал овард, ки пайваста ба варзиш машғул шаванд.
Гуфта шуд, ки Президенти Ассотсиатсияи футболи Осиёи Марказӣ (CAFA), Президенти Федератсияи футболи Тоҷикистон муҳтарам Рустами Эмомалӣ 10-уми феврали соли 2024 пешниҳод намуданд, ки нақши футбол дар сатҳи ҷаҳонӣ эътироф карда шавад ва дар Созмони Милали Муттаҳид тавассути қабули қатъномаи махсуси Маҷмаи Умумии Созмони Милали Муттаҳид “Рӯзи ҷаҳонии футбол” расман эълон гардад.
Дар робита ба ин, рӯзи 7-уми майи 2024 зимни ҷаласаи 80-уми пленарии иҷлосияи 78-уми Маҷмаи Умумии Созмони Милали Муттаҳид қатъномаи “Рӯзи ҷаҳонии “футбол”-ро, ки аз ҷониби Ҷумҳурии Тоҷикистон, Подшоҳии Баҳрайн ва Давлати Либия таҳия ва пешбарӣ шуда буд, бо иттифоқи оро қабул намуд.
Инчунин, Маҷмаи Умумии Созмони Милали Муттаҳид қарор қабул кард, ки 25-уми май ҳамчун “Рӯзи ҷаҳонии футбол” эълон карда шавад, зеро соли 2024 садсолагии аввалин мусобиқаи байналмилалии футбол, ки бо иштироки намояндагони тамоми минтақаҳо дар Бозиҳои тобистонаи олимпии соли 1924 дар шаҳри Парижи Фаронса баргузор гардида буд, ҷашн гирифта мешавад. Дар охир бо иштирокчиён флешмоб гузаронида шуд.