ВАЗЪИ БАДИ "ТОҶИК ЭЙР" ТАСДИҚ ШУД

Оид ба муфлисшавии ягона ширкати ҳавопаймои давлатӣ "Тоҷик Эйр" Дилшод Сафарзода, директори Агентии авиатсияи граждании назди Ҳукумати Ҷумҳурии Тоҷикистон дар нишасти хабарӣ гуфт, ки хулосаи комиссияи давлатиро интизоранд.
Ӯ зикр кард, ки ҳама аз муфлисшавӣ мегӯянд, вале ҳоло ягон чиз аниқ нест. Кор рафта истодааст ва мо хулосаи комиссияро интизорем.
Ҳамзамон, директори ширкат тасдиқ намуд, ки воқеан ҳам ширкат дар вазъияти бади молиявӣ қарор дорад.
- Дар ҳақиқат ширкати “Тоҷик эйр” дар ҳоли ҳозир дар ҳолати вазнини молиявӣ қарор дорад. Лекин ба ин нигоҳ накарда, мо корбарӣ карда истодаем. Кормандони мо аз як гиребон сар бароварда, кӯшиш доранд, аз ин вазъият бароянд,-гуфт Дилшод Сафарзода.
Инчунин, ӯ изҳор дошт, он пешниҳодҳое, ки аз ҷониби шарикони тиҷоратӣ дастрас гардиданд, гурӯҳҳои корӣ омӯхта истодаанд. Ба гуфтаи ӯ, ин вазъияти молиявӣ, бахусус, баъди пандемия на танҳо ба ин ширкат, балки ба бисёр ширкатҳои ҳавопаймоии ҷаҳон низ таъсири худро расонд. Мо умедворем, ки хулосаи мусбӣ баҳогузорӣ карда мешавад ва шурои нозирон пешниҳод карда мешавад ва дар ниҳояти ҳол ба мо иҷозат дода мешавад, ки парвоз кунем.

Қурбон АҲМАДЗОДА