
Раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон Абдулло Раҳмонзода дар ҷараёни нишасти хабарӣ ба рӯзноманигорон иттилоъ дод, ки дар натиҷаи иштирок дар мусобиқаҳои сатҳи байналмилалӣ варзишгарони кишвар ба хазинаи варзишии мамлакат 269 медал ворид намуданд, ки аз ин шумора 64 медали тилло, 77 нуқра ва 128 медали биринҷӣ мебошад, ки нисбат ба ҳамин давраи соли 2021-ум 38 медали тилло, 43 медали нуқра ва 97 медали биринҷӣ зиёд мебошад.
Ҳамчунин, гуфта шуд, ки муаррифии варзиши тоҷик дар сатҳи ҷаҳон ва дарёфту омода намудани варзишгарони касбии сатҳи баланд тавассути баргузории мусобиқаҳои сатҳи ҷумҳуриявӣ ва чемпионатҳои Ҷумҳурии Тоҷикистон амалӣ гардонида мешавад. Дар ин давра, бо ташаббуси кумита 49 мусобиқаи сатҳи ҷумҳуриявии варзишӣ баргузор карда шуд, ки дар онҳо 5127 нафар, аз ҷумла 1044 нафар бонувон иштирок намуданд.
- Дар доираи марҳила ба марҳила доир намудани мусобиқаҳои варзишӣ дар сатҳи шаҳру ноҳияҳо 1715 марҳилаи мусобиқаҳои шаҳриву ноҳиявӣ ва 235 мусобиқаҳои вилоятӣ, минтақавӣ ва шаҳри Душанбе баргузор гардиданд, ки дастаҳои вилоят ва шаҳру ноҳияҳо тибқи дастурамали марҳила ба марҳила доир намудани мусобиқаҳои варзишӣ ба марҳилаи ҷумҳуриявӣ роҳ ёфтанд, - гуфт Раҳмонзода.
Қурбон АҲМАДЗОДА