Санкт-Петербург: Форуми «Занон: вазифаҳои глобалӣ бо воқеияти нав»

«Вазифаи занон дар рушди дипломатияи сулҳ ва боварӣ» - аз мавзуъҳое буд, ки 12-15 октябр зимни ҳамоише дар чорчўби Анҷумани сеюми занони АвруОсиё дар шаҳри Санкт-Петербурги Федератсияи Русия мавриди баҳс қарор гирифт. Анҷуман бо ибтикори Шурои Федератсияи Русия ва Ассамблеяи байнипарлумонии кишварҳои узви Иттиҳоди Давлатҳои Мустақил доир шуд.
Ҷаласаи умумии анҷуманро раиси Шурои Федератсияи Маҷлиси Федералии Федератсияи Русия Валентина Ивановна Матвиенко ифтитоҳ кард.
Хайринисо Юсуфӣ - муовини Раиси Ҳизби Халқии Демократии Тоҷикистон, ки аз иштирокчиёни анҷуман буд, дар ҷаласаи умумии он суханронӣ намуд.
Муовини Раиси Ҳизби Халқии Демократии Тоҷикистон, аз ҷумла гуфт: -Имрўз шуморо аз минбари Форуми сеюми занони АвруОсиё табрик гуфтан хеле шарафнок ва боиси хушбахтӣ аст. Бо ташаббуси шумо, Валентина Михайловнаи азиз оғоз шудани ин ҳамоиш на танҳо барои минтақа, балки барои тамоми ҷаҳон як рўйдоди муҳим мебошад. Иштироки ҳайатҳои намояндагии васеи занон аз кишварҳои гуногун, аз созмонҳо ва иттиҳодияҳои байналмилалӣ, идораву ташкилотҳои вобаста ба Созмони Милали Муттаҳид ва дигар шарикони калидӣ, ки ҳама бо як ҳадафи олӣ-баланд бардоштани нақши занон ва дастгирии рисолати ҷаҳонии онҳо дар шароит ва бо воқеияти нав, худ гувоҳи дар сатҳи баланд баргузор шудани ин ҳамоиши мост.
Сипас, муовини Раиси ҲХДТ бо ишора ба таҳаввулоти назаррас дар рўзгори мардуми кишварамон гуфт: - Иҷозат диҳед ба шумо чанд намунаҳоеро аз дастовардҳо ва пешрафти кишвари азизи ман - Ҷумҳурии Тоҷикистон зикр кунам, ки дар солҳои охир ба шарофати таҳия ва татбиқи стратегияҳои мақсадноки миллӣ барои занон ба даст омадааст.
Пеш аз ҳама, шумораи занон дар парлумони кишвар, дар вазифаҳои раҳбарии ҳамаи вазорату идораҳо, дар тиҷорат ва соҳибкорӣ зиёд шуд.
Ҳамин тариқ, ҳиссаи занон дар парлумон аз ду фоизи дар соли 2001 то бисту ҳашт дар соли 2020 афзоиш ёфт.
• Соли 2000 дар ҳукумат танҳо як зани вазир буд; соли 2020 – теъдодашон ба се нафар, аз ҷумла як зан - муовини сарвазир расид.
• Дар соли 2008 танҳо даҳ дарсади занон дар бахши хусусӣ раҳбарӣ мекарданд, имрўз ин рақам ба бисту панҷ дарсад расидааст.
Ин танҳо чанд рақамест, ки натиҷаҳои татбиқи пайгиронаи сиёсати Президенти мо, Асосгузори сулҳ ва ваҳдати миллӣ-Пешвои миллат ва Роҳбари Ҳукумати кишварро дар пешбурди нақши занон дар ҷомеа инъикос мекунад. Дар ин раванд, аз ҷумла, барномаҳои грантҳои президентӣ барои занони соҳибкор, стипендияҳои президентӣ барои духтарон аз ноҳияҳои дурдаст, интихоб, омўзиш ва пешбарии духтарони боистеъдод ва занони роҳбарикунанда низ амалӣ карда шуданд. Ҷолиби диққат аст, ки моҳи марти соли равон Стратегияи навбати сеюм оид ба баланд бардоштани нақши занон қабул шуд, ки он якҷо бо Нақшаи мушаххаси миллии амал дастгирӣ мешавад.
Мавсуф дар идомаи сухан иброз дошт: - Аз ин минбар рў ба рўи шумо ҳарф зада, наметавонам доир ба масъалае, ки имрўз тамоми ҷомеаи ҷаҳонро ба ташвиш овардааст,чанд сухан нагўям. Ман вазъияти Афғонистонро дар назар дорам.
Мутмаинам, ки ҳар як иштирокчии ин ҳамоиш, аз тағйироту бесуботиҳои охир дар ин кишвар, ҳодисаҳои мудҳиши ба сари занону духтарони афғономада огаҳӣ доранд. Он чи дар Афғонистон мегузарад, нишон медиҳад, ки то чи андоза занону духтарон, ҳатто дар ҷаҳони муосир осебпазиранд. Имрўз вазъи занони афғон дахолати фаврии ҷомеаи ҷаҳонро тақозо мекунад. Мо ҳақ надорем, ки чашмони худро ба нақзи ҳуқуқи зани афғон пўшем, хусусан дар ҳолатҳое, ки ҳуқуқи занон ба таҳсил, кор ва иштироки фаъол дар ҳукумат сарфи назар, издивоҷҳои бармаҳал ва маҷбурӣ ба дараҷаи сиёсати давлатӣ боло бурда мешаванд.
Овози мо бояд шунида шавад!
Дар форуми мазкур, ки дар маҳдудаи таърихии Қасри Таврический, Маркази парлумон, Осорхона ва Маҷмааи Намоишгоҳи "Олами Об" баргузор шуд, тақрибан 350 вакил аз 110 кишвар, аз ҷумла занони аъзои парлумон ва намояндагони созмонҳо аз Озарбойҷон, Бангладеш, Ветнам, Қазоқистон, Қирғизистон, Габон, Мозамбик, Муғулистон, Молдова, Никарагуа, Тоҷикистон, Туркманистон, Зимбабве ва Эрон, намояндагони мақомоти иҷроия, роҳбарони ташкилотҳои байналмилалӣ ва ғайриҳукуматӣ, инчунин намояндагони доираҳои соҳибкорӣ, ташкилотҳои ҷамъиятӣ ва илмӣ иштирок карданд.

Солеҳ Юсуфов