Оё намояндагони Ҷабҳаи муқовимат ба Маскав даъват шудаанд? Посухи Кобулов

ДУШАНБЕ, Русия ба ҳамоиши Маскав дар мавриди Афғонистон намояндагони Ҷабҳаи муқовимат аз Панҷшерро даъват накардааст.
Дар ин бора РИА "Новости" аз қавли Замир Кобулов хабар додааст. Ба суол дар ин маврид фиристодаи раиси ҷумҳури Русия посух додааст, ки аз танҳо "Толибон"-ро даъват намудаанд.
Инчунин мақомоти Русия даъват шудани Ҳомид Карзай, раиси ҷумҳури пешин ва Абдуллоҳ Абдуллоҳ, раиси Шӯрои мусолиҳаи миллии ин кишварро рад кардаанд.
Ахиран хабар дода шуд, ки Абдусалом Ҳанафӣ, ноиби раиси ҳукумати "Толибон"* дар садри як ҳайати ин созмони мамнуъ дар ҳамоиши Маскав дар мавзӯи Афғонистон иштирок хоҳад кард.
Инъоммулоҳ Самангонӣ, узви комиссияи "Толибон" дар умури фарҳанг низ изҳор доштааст, ки ҳукуматдорони ҷадиди Кобул иштирок дар ҳамоиши Маскавро чун имкони роҳандозии иртиботи расмӣ бо кишварҳои дигар медонанд.
"Ҳайати баландпояи Афғонистон таҳти роҳбарии ноиби сарвазир дар Маскав бо намояндагони кишварҳои гуногун масоили гуногуни марбут ба Афғонистонро баррасӣ мекунанд", - изҳор дошт Самангонӣ.
Мулоқоти мазкур 20 октябр баргузор мешавад.

Душанбе-Sputnik