ВМКБ: ИСТИҚЛОЛИЯТ БА РУШДИ АФКОРИ ҶАВОНОН ТАЪСИРИ АМИҚ ГУЗОШТ

ВМКБ;-Дар кишвари мо бештари аҳолиро ҷавонон ташкил медиҳанд. Ин табақаи ҷомеа солҳои охир дар маркази таҳаввулоти хеле ҷиддиву муҳим дар ҷомеа, таъсиси сохтори нави сиёсӣ, бозсозии иқтисодӣ, мустаҳкам кардани пояҳои истиқлолияти миллӣ ва эҳёи ҷомеаи шаҳрвандӣ қарор гирифтанд. Ин дигаргуниҳо ба андеша, афкор ва тарзи зисти ҷавонон таъсири амиқ расонида, барои ҳамоҳанг сохтани онҳо бо равандҳои сиёсӣ, иқтисодӣ ва иҷтимоии ҷаҳони муосир замина гузоштанд. Аз ин лиҳоз, ба сифати захираи стратегии миллат эътироф кардани ҷавонону бартарият додан ба фаъолияти онҳо тақозои замон мебошад.
Имрӯз шумораи умумии ҷавонон дар Вилояти Мухтори Кӯҳистони Бадахшон зиёда аз 82 357 нафар буда, аз ин теъдод ҷавонони то 35 - сола беш аз 60 фоизи аҳолии вилоятро ташкил медиҳанд. Қобили зикр аст, ки Ҳукумати мамлакат ба кадрҳои ҷавону лаёқатманд диққати заруриро дода, ҳоло 268 нафар ҷавонони вилоят дар мансабҳои роҳбарикунанда кор мекунанд.
Дастгирии иҷтимоии ҷавонон дар самти ҷудо намудани қитъаҳои замини наздиҳавлигӣ, ҷалби соҳибкории хурду миёна ва дастрасӣ ба қарзҳои имтиёзнок дар мадди назари мақомоти вилоят қарор дошта, танҳо соли 2020 ба 58 нафар омӯзгори ҷавон, ки зиёда аз се сол собиқаи кории омузгорӣ доранд, тавассути филиали Бонки давлатии амонатгузории Ҷумҳурии Тоҷикистон “Амонатбонк” ба маблағи 348 ҳазор сомонӣ қарзҳои имтиёзнок дода шудааст.
Имрӯз қарздиҳии хурд омили асосии рушди соҳибкории инфиродӣ гардида, ба ҳалли масъалаҳои иҷтимоии ҷавонон, аз ҷумла ташкили ҷойҳои нави корӣ мусоидат менамояд. Ин аст, ки ҳамасола дастрасии соҳибкорони хурду миёна ба манбаъҳои молиявӣ афзун гардида, аз ҷониби бонкҳо ва ташкилотҳои қарздиҳии дар вилоят фаъ-олиятдошта, давоми сол ба маблағи зиёда аз 84,9 миллион сомонӣ қарзҳои хурд дода шудааст.
Бо мақсади ҷалби наврасону ҷавонон ба варзиш дар вилоят 10 мактаби варзишӣ фаъолият менамоянд, ки аз ин 1 маркази омодагии олимпӣ, 1 мактаби махсуси гӯштинҳои вилоят, 8 мактаби варзишӣ дар шаҳру ноҳияҳои вилоят мебошад. Дар зарфи 30 сол умуман 403 иншооти варзишӣ сохтаву ба истифода дода шудааст.
Дар шаҳру ноҳияҳои вилоят ҷиҳати рушди соҳаи варзиш, ҷалби наврасону ҷавонон ба он ва ташвиқу тарғиб намудани тарзи ҳаёти солим, танҳо соли 2020 дар ҳудуди шаҳри Хоруғу ноҳияҳои вилоят 16 майдончаи варзишӣ ба маблағи 10 миллиону 650 ҳазору сад сомонӣ аз тарафи Ҳукумати Ҷумҳурии Тоҷикистон, шарикони рушд ва соҳибкорони саховатпеша сохта шуда, мавриди истифода қарор дода шуданд. Ин раванд дар соли 2021 низ ҳадафнок давом ёфта, тибқи дастури Сарвари давлат то соли 2030 бунёди 81 майдонча ва 87 толори варзишӣ дар деҳаҳое, ки аз 100 хоҷагӣ зиёд доранд, ба нақша гирифта шудааст.
Дастовардҳои варзишии ҷавонони вилоят ҳам сол аз сол зиёд гашта, соли равон ҷавонони вилоят дар мусобиқаҳои ҷумҳуриявӣ ва байналмилалӣ сазовори 188 медал, аз ҷумла 36 медали тилло, 62 медали нуқра ва 90 медали биринҷӣ гардиданд.
Бо дастури бевоситаи Пешвои муаззами миллат барои дастгирӣ ва ҳавасмандгардонии ҷавонон дар даврони соҳибистиқлолӣ як қатор имконоту имтиёзҳо фароҳам оварда шуда, дар самти илмомӯзӣ ҷавонон пайваста ҳавасманд карда мешаванд.
Бояд гуфт, ки агар соли 2006 шумораи гирандагони Стипендияи президентӣ дар мактабҳои таҳсилоти ҳамагонии вилоят ҳамагӣ 16 нафарро ташкил медод, имрӯзҳо ин шумора ба 80 расонида шуд.
Ҳамзамон дар асоси нақшаи Вазорати рушди иқтисод ва савдо ба хонандагони МТМУ – и ВМКБ соли равон 170 Квотаи президентӣ ҷудо гардида, ҳамаи квотаҳо аз худ гардиданд.
Хонандагони мактабҳои таҳсилоти миёнаи умумии вилоят бошанд, дар олимпиадаҳои фаннӣ, номӣ ва онлайнӣ фаъолона ширкат намуда, ба натиҷаҳои назаррас ноил шуданд. Аз ҷумла, соли равон дар даври ниҳоии олимпиадаи фаннӣ аз фанҳои силсилаи табиӣ – риёзӣ ва гуманитарӣ шаш медали тилло, 17 нуқра ва 58 медали биринҷиро ба даст оварданд, ки дар умум 81 медал мебошад. Инчунин, 82 нафар хонандагони МТМУ – и вилоят дар олимпиадаҳои байналмилалии “Архимед” дар Ҷумҳурии халқии Чин ва олимпиадаи “Кенгуру” дар кишвари Австралия аз фанни математика иштирок карда, соҳиби 19 медал гаштанд. Аз инҳо, се медали тилло, 6 нуқра ва 10 адад биринҷӣ буда, ин беҳтарин дастоварди соҳаи маорифи вилоят ба ифтихори 30 соли истиқлол мебошад.
Дар арафаи 30 - солагӣ 80 фоизи муассисаҳои таълимии қаламрави вилоят пурра таъмиру навсозӣ гардида, дар шаҳру деҳоти вилоят қариб 100 мактаби таҳсилоти миёнаи умумӣ сохта шуд. Аз ҷумла, дар шаҳри Хоруғ Мактаби президентӣ барои хонандагони болаёқат бо тамоми таҳҷизоти муосир ва хобгоҳи замонавӣ сохта шуд, ки имрӯз дар ин муассиса зиёда аз 1000 нафар хонандагон на фақат аз шаҳру навоҳии вилоят, балки аз дигар минтақаҳои кишвар низ таҳсил мекунанд.
Муҳайё гардидани шароити хуб барои таълим ба беҳтар гаштани донишу ҷаҳонбинии наслҳои ояндасоз таъсири хуб расондааст. Ҳамасола бештар аз 85 фоиз хатмкунандагони муассисаҳои таҳсилоти миёнаи умумии вилоят ба муассисаҳои таҳсилоти олии касбии кишвару хориҷ аз он дохил мешаванд. Имрӯз зиёда аз 900 нафар ҷавони ВМКБ дар донишгоҳҳои бонуфузи хориҷӣ таҳсил менамоянд.
Яке аз ҷавонони муваффақи вилоят ректори Донишгоҳи давлатии Хоруғ ба номи Моёншо Назаршоев Гулзорхон Юсуфзода тамоми муваффақиятҳои илмиву тадқиқотиашро ба солҳои соҳибистиқлолӣ марбут дониста, мегӯяд, маҳз таваҷҷуҳи роҳбарияти мамлакат буд, ки ҷавонон имрӯз ба дастовардҳои бузург даст меёбанд:
- Ҳамаи дастовардҳои илмиву кории банда ба туфайли дастуру ҳидоятҳои Пешвои муаззами миллат, муҳтарам Эмомалӣ Раҳмон рӯи даст омаданд. Моро мебояд, ки аз ин пас ҳам дар таҳкими донишу маърифат ва илмомӯзии наслҳои ояндасоз содиқона иқдом намоем, - иброз намуд, ректори донишгоҳ.
Бояд гуфт, ки имрӯзҳо ҳисси миллатдӯстии ҷавонони вилоят боло рафта, ба муқаддасот, арзишҳои миллӣ, таъриху тамаддун ва фарҳанги волои хеш арҷ мегузоранд ва бо шукргузорӣ аз неъматҳои фаровону дастовардҳои бемисли Истиқлолияту ваҳдати миллӣ баҳри ободонию созандагӣ иқдом мекунанд.
Вобаста ба ин Ҳамроз Хушдилзода, комиссари ҳарбии ВМКБ гуфт, ки дар саргаҳи ҳамаи ин азхудгузаштанҳои Пешвои миллат меистад. Ӯ илова кард, ки насли ҷавон чун ҳомию пушту паноҳи давлат зидди ҳама гуна ҳодисаҳои номатлуб муборизаи беамон бурда, ҳама гуна амалҳои хиёнаткоронаву ифротгароёнаро маҳкум менамоянд ва дар чорабиниву ҷамъомадҳои давлативу ҷамъиятӣ, ҳарбӣ – сиёсӣ ва фарҳангии сатҳҳои гуногун иштироки фаъолона доранд.
- Маҳз масъулияту ҷасорат, поквиҷдонӣ, садоқат ба Ватан – Модар ва меҳанпарастии ҷавонон аст, ки чанд соли охир сифати омодагӣ, рафти баргузории маъракаи даъвати баҳорию тирамоҳии ҷавонписарон ба хизмати ҳарбӣ таҳкиму тақвият ёфта истодааст. Мукофоту рутбаҳои ҳарбӣ ва дигар дастоварҳои камина худ аз он гувоҳӣ медиҳанд, ки то чи андоза Ҳукумати кишвар, Сарфармондеҳи олии Қувваҳои Мусаллаҳи мамлакат дар ҳаққи ҷавонон ғамхоранду пуштибони ҳамаи мо мебошанд. Ҷавобан ба ин ғамхориҳо ба Ватани хеш то дами охир бояд содиқона хизмат кунем, - илова намуд, Ҳ. Хушдилзода.
Сардори Раёсати кор бо ҷавонон ва варзиши ВМКБ Сураҷ Чоршанбиев низ андешаҳои Хушдилзодаро тақвият дода, гуфт, ки имрӯз садҳо нафар варзишгарон бо натиҷаҳои беҳтарин ва иншооти муосири варзишӣ дар вилоят дорем, ки ҳамааш натиҷаи ин ғамхориҳо мебошад.
Таҷрибаи корҳои созандагиву бунёдкории ҷавонон дар давраи соҳибистиқлолӣ нишон дод, ки ҷавонон дар пешрафти тамоми соҳаҳои ҳаёти ҷомеа иштироки фаъолона дошта, дар раванди корҳои созандагиву бунёндкорӣ саҳмгузорӣ менамоянд. Дар ин баробар метавон гуфт, ҷавонон дар вилоят пешгоми ҳалли тамоми масоили марбути ҷомеа ҳастанд.

Машҳур ИМОМНАЗАРОВ