БРСММ: Баномаҳои мо ба рушди иқтисодӣ ва иҷтимоии ҷомеа равона шудаанд

Дар бинои БРСММ дар Тоҷикистон нишасти матбуотӣ бо иштироки Ҳамоҳангсоз ва намояндаи доимии БРСММ дар Тоҷикистон хонум Пратибха Меҳта, Сафири Фавқулода ва Мухтори Федератсияи Россия дар Тоҷикистон Игор Лякин-Фролов, намояндаи Вазорати рушди иқтисоди Федератсияи Россия Наталия Стригунова ва Роҳбари Фонди трастии БРСММ - Россия Александр Аверченков ва хабарнигорони кишвар баргузор шуд.
Зикр гардид, ки ҳайати ҳукуматии Федератсияи Россия бо натиҷаҳои лоиҳаҳои БРСММ дар Тоҷикистон, ки аз ҷониби Ҳукумати Федератсияи Русия маблағгузорӣ карда мешавад, аз наздик дидан карданд. Дар ин ҳайат намояндагони Вазорати рушди иқтисодӣ ва Вазорати корҳои хориҷии Федератсияи Русия иштирок намуданд. Саҳми Федератсияи Россия дар рушди Ҷумҳурии Тоҷикистон тавассути лоиҳаҳое, ки аз ҷониби Барномаи рушди СММ дар Тоҷикистон татбиқ карда мешаванд, аз соли 2014 инҷониб 15 миллион доллари амрикоиро ташкил медиҳад. Ҳоло дар доираи Фонди мақсадноки Русия-БРСММ дар Тоҷикистон шаш лоиҳа амалӣ шуда истодаанд, ки ба ҳалли мушкилоти иҷтимоию иқтисодӣ ва масъалаҳои иқлим нигаронида шудаанд.
«Тағйирёбии иқлим ба Тоҷикистон низ таъсиргузор аст, аз ин рӯ яке аз соҳаҳое, ки мо дар ҳамкорӣ бо Федератсияи Русия кор мекунем, ҳалли мушкилоти осебпазирии ин зуҳурот мебошад. Тоҷикистон дар байни давлатҳои партобкунандаи миқдори зиёди газҳои зарарнок ба ҳаво ҷо надошта бошадҳам, аммо таъсири обу ҳаво, ки ба хоҷагии қишлоқ ва амнияти озуқавории кишвар зарар мерасонанд, хеле баланд аст"- мегӯяд намояндаи доимии БРСММ дар Тоҷикистон хонум Пратибха Меҳта. "Бо кӯмаки молиявии Федератсияи Русия ва бо дастгирии мо, Тоҷикистон аллакай аз ҳисоби Фонди Мутобиқсозӣ ба кишвар тақрибан 10 миллион долларро барои ҳалли мушкилоти марбут ба тағирёбии иқлим ба кишвар ҷалб кардааст ва мо умедворем, ки бар асоси ин таҷриба, мо метавонем ба миқдор то 60 миллион доллар кӯмак расонем. "- илова намуд ӯ. Дар ҷараёни боздид, аъзоёни ҳайат бо намояндагони вазоратҳои шарикӣ дар Ҷумҳурии Тоҷикистон вохӯрданд, ки дар он рафти татбиқи лоиҳаҳоро баррасӣ ва нақшаҳои ояндаро муҳокима кардаанд.
«Кӯмаки мо бисёрҷониба буда, лоиҳаҳои мо соҳаҳои гуногуни иқтисодӣ ва иҷтимоии Тоҷикистонро фаро мегиранд. Аллакай соли гузашта панҷ лоиҳа ба ҳалли масъалаҳои занону ҷавонони деҳот дар водии Зарафшон ва дастгирии онҳо дар самти соҳибкорӣ ва навовариҳо равона гардиданд"- гуфт Игор Лякин-Фролов, Сафири Фавқулода ва Мухтори Федератсияи Россия дар Ҷумҳурии Тоҷикистон дар нишасти мазкур.
Г. Мадимар