Ҷашни Соли нав дар Арабистон

Дар остонаи ҷашни Соли нав саҳифаи твитерии «Колиндар ас — Саудия» (Тақвими Саудӣ), ки ба паҳну хабардор кардани маросимҳо ва ҷашнҳо дар Арабистон машғул аст, бо эълони хабари ҷашни Соли нави мелодӣ навишт, ки ин маросим 31декабр дар шаҳри Ар-Риёз (пойтахти кишвар) ва минтақаи Сахараи Арабистон баргузор хоҳад шуд.
Гуфта мешавад, дар соатҳои ин ҷашн,ҳамчунин,қарор аст оташбозӣ ва баргузории мусиқии «DJ», маросими истиқбол аз Соли нави мелодӣва ҳамзамон, дигар барномаҳои фарҳангӣ – истироҳатӣ доир мегардад.
Лозим ба зикр аст, ки эълони баргузорӣ ва замони ин маросим дарҳол мавриди интиқодҳои бисёре аз корбарону масъулони мазҳабии ин кишвар шуд. Дар ҳоле ки Солеҳ ал-Фавзон, як узви ҳайати уламои Саудӣ ҳам пеш аз ин гуфта буд, ки ҳузур дар маросимҳои оғози Соли мелодӣ ҳаром ва бидъати шаръӣ аст.Аммо таҳлилгарони масъалаҳои сиёсиву иҷтимоӣ мегўянд, чунин як гиромидошт ва иҷозат барои баргузории маросими таҷлил аз Соли навимелодӣ дар чорчўби иқдомоте аст, ки Муҳаммад бен Салмон аз замони валиаҳдии худ оғоз карда, ки аз онҳо ба унвони «ислоҳот» ёд мешавад. Созмони «Саргармӣ» ё «Фароғат»-и Саудӣ ба роҳбарии Туркӣ Оли Шайх, ки дар соли 2016 таъсис шудааст, сарпараст (мутаваллӣ)-и баргузории ин гуна маросимҳо дониста мешавад.
Баргузории ҷашни Соли нав дар ҳолест, ки бузургтарин консерти «DJ» (иҷро ва намоиши оммавии мусиқӣ)-и Ховари Миёна низ пештар (19 то 21 декабр) дар Арабистон доир шуд.