«Ҳамватан» - дар меҳмонии мо

Дар толори маҷлисгоҳи шуъбаи маорифи шаҳри Ҳисор Маҷлиси Кумитаи иҷроияи ҲХДТ баргузор гардид. Маҷлиси навбатӣ бо иштироки аъзои раёсати Кумитаи иҷроия, Комиссияи тафтишотии ҲХДТ дар шаҳри Ҳисор, раисон ва аъзои ташкилотҳои ибтидоӣ, роҳбарони корхонаю муассиса, раисони ҷамоатҳои шаҳраку деҳот ва дигар аъзои фаъоли ҳизб баргузор шуда, дар кори он масъалаҳои ҷамъбасти фаъолияти Кумитаи иҷроия дар нимсолаи аввали соли 2019, дар сатҳи баланди ташкилӣ баргузор намудани маъракаи муҳими сиёсии “Обуна-2020” ба рӯзномаи ҷумҳуриявии ҳизбии “Минбари халқ” ва дигар масъалаҳои ҷорӣ мавриди таҳлил ва баррасӣ қарор гирифтанд. Дар рафти маҷлис фаъолияти хуби аъзои ҳизб - узви комиссияи тафтишотӣ - Сироҷиддин Каримзода, раисони ташкилотҳои ибтидоии “Агротехсервис” Ҳусейн Давлатов, “Мӯъминобод” Абдумаҷид Мўминов, директори Муассисаи давлатии таълимии “Коллеҷи тиббӣ”-и шаҳри Ҳисор Азимов Гурез Ҷалилович хуб арзёбӣ ва бо Сипосномаҳои КИ ҲХДТ дар шаҳри Ҳисор қадрдонӣ шуданд.
Дар кори маҷлис раиси Шӯрои ҷамъиятии “Ҷамъияти миллӣ-фарҳангии тоҷикон “Ҳамватан” дар вилояти Иркутски Федератсияи Россия Маликшоев Муриват иштирок ва суханронӣ намуда, аз ҳамкорӣ ва дастгириҳои доимии намояндагони Кумитаи Иҷроияи Марказии ҲХДТ ва Кумитаи иҷрояи ҲХДТ дар шаҳри Ҳисор изҳори қаноатмандӣ намуд. Ў аз номи Ҷамъияти тоҷикони бурунмарзӣ ба раиси КИ ҲХДТ шаҳри Ҳисор Сипоснома ва туҳфаи хотиравӣ супорид.
Дар фарҷом ба як зумра аъзои нав шаҳодатномаҳои ҳизбӣ дар вазъияти тантанавӣ супорида шуданд.