Футболи Осиё-2019

Дастаи мунтахаби занонаи Тоҷикистон (U-16) дар аввалин бозиаш дар марҳалаи аввали интихобии мусобиқаи қаҳрамонии футболи Осиё-2019 миёни духтарони зери 16-сола дар гуруҳи «С» аз тими Сингапур (U-16) бо ҳисоби 1:4 шикаст хӯрд.

Ин бозӣ рӯзи шанбеи 15-уми сентябр дар Варзишгоҳи марказии шаҳри Ҳисор баргузор шуд. Ҳисобро бозигари мунтахаби Тоҷикистон Амина Собирова дар дақиқаи 12-ум боз кард. Вале баъдан духтарони футболбози тоҷик аз ҳамсолонашон аз Сингапур чор гол хӯрданд. Се голро Путри Нур Сялиза дар дақиқаҳои 14-ум, 19-ум ва 34-ум ва як голро Данелле Тан Ли Ерн дар дақиқаи 33-юм ба ҳадаф расонданд.

Дар бозии дигари гуруҳи “С” тими мунтахаби Эрон (U-16) ба дарвозаи дастаи мунтахаби Ҷазираҳои Мариани Шимолӣ (U-16) 12 голи беҷавоб зад.

Натиҷаҳои гуруҳи "С"

Дар гуруҳи «С» барои дарёфти роҳхат ба даври баъдӣ дастаҳои мунтахаби духтарони зери 16-солаи Тоҷикистон, Тайланд, Эрон, Ҷазираҳои Мариани Шимолӣ ва Сингапур рақобат мекунанд. Мусобиқаи интихобӣ дар ин гурӯҳ то 23-юми сентябр дар Варзишгоҳи марказии шаҳри Ҳисор идома меёбад.

Бозиҳои даври дувум рӯзи душанбеи 17-уми сентябр баргузор мешаванд. Бозӣ миёни дастаҳои мунтахаби Сингапур ваТайланд дар Варзишгоҳи марказии Ҳисор соати 16:00 шуруъ мешавад. Баъдан соати 19:00 дар ин варзишгоҳ тимҳои Тоҷикистон ва Ҷазираҳои Мариани Шимолӣ рақобат мекунанд.

Ба марҳалаи дувуми интихобии қаҳрамонии Осиё-2019, ки аз 23-юми феврал то 3-юми марти соли оянда баргузор мешавад, ҳашт дастаи марҳалаи аввали интихобӣ – ғолибони шаш гурӯҳ ва ду дастаи беҳтарини ҷойҳои дувум – роҳ меёбанд.

Бояд гуфт, ки се дастаи беҳтарини мусобиқаи қаҳрамонии охирини Осиё – Кореяи Шимолӣ, Кореяи Ҷанубӣ ва Ҷопон – ба мусобиқаи қитъавӣ, ки соли оянда доир мешавад, мустақиман роҳхат гирифтанд.