ВОХӮРИИ ВАКИЛОН БО СОКИНОНИ МАҲАЛЛАИ НАВРӮЗИ НОҲИЯИ ФИРДАВСӢ

Ххдт Фирдавсӣ:- Бо иқдоми Кумитаи иҷроияи ҲХДТ дар ноҳияи Фирдавсӣ вохӯрии коршиносон ва вакили ноҳия бо сокинони маҳаллаи “Наврӯз”-и ноҳия доир гардид. Сайфулло Сафаров, муовини директори Маркази тадқиқоти стратегии назди Президенти Ҷумҳурии Тоҷикистон, вакили Маҷлиси вакилони халқи шаҳри Душанбе, доир ба равандҳои ҷаҳонишавӣ, омилҳои номатлубе чун ифротгароӣ ҳарф зада, дар бораи тарбияи насли наврас дар рӯҳияи худшиносию худогоҳии миллӣ ибрози андеша намуд. Мавсуф таъкид кард, ки дар шароити ҷаҳонишавӣ қувваҳое ҳастанд, ки мафкураи ҷавононро аз худ намуда, ба манфиатҳои нопоки хеш истифода менамоянд. Аз ин лиҳоз заминаи тарбия волидайн ва ҷомеа бояд устувор ва судманд бошад.
Одинашоҳ Қосимов, сардори шуъбаи Агентии меҳнат ва шуғли аҳолии ноҳияи номбурда дар мавриди касбу ҳунаромӯзӣ ва бо кор фаро гирифтани аҳолии бешуғлу бемаълумот таклифу пешниҳодҳои судманд намуд.

Сокинони маҳалла ҷиҳати барқарор намудани масчид, бунёди варзишгоҳу майдончаи бозии кӯдакон, бозор, роҳандозӣ намудани хатсайри нақлиёт, бунёди корхонаро дархост намуданд.
Коршиносон ва вакили ноҳия Матлуба Каримова ваъда доданд, то қадри имкон дар самти мушкилу норасоиҳои мавҷуда ва дархосту пешниҳодҳои сокинон корбарӣ хоҳанд намуд.