11 номзади интихоботи президентии Қирғизистон "доғи судӣ" доштаанд

Аз шумори умумии онҳое, ки барои номзад шудан ба мақоми президентии Қирғизистон ариза додаанд, 11 нафар ба ҷавобгарии ҷиноӣ ҷалб шудаанд. Аз ин шумор 7 танашон доғи судӣ гирифтаанд. Дар ин бора раиси Комисияи марказии интихоботии Қирғизистон Нурҷон Шайлдабекова хабар медиҳад.
Ба гуфати вай, бархе аз номзадҳо чанд доғи судӣ доранд. 1 номзад ду маротиба барои қаллобӣ суд шудааст.

"Як ҳолати бемасъулиятӣ аз ҷониби номзадҳо дида мешавад. Қонунҳои мо либералӣ ҳастанд, ки бар асоси ин қонунҳо, номзад баъди адои ҳукм ё пардохти ҷаримаи додгоҳ ҳақ дорад дар интихобот ба ҳайси номзад иштирок кунад. Аммо, эҳтимол мисли Ғарб мо ҳам марҳилаи "танзими ахлоқӣ"-ро роҳандозӣ кунем. Ба ҳар сурат, Комиссияи марказии интихоботӣ дар асоси қонун фаъолият мекунад", - гуфт Шайлдабекова.

Ба гуфтаи вай, миёни талабкорони курсии президентӣ 7 зан ва 52 мард ҳастанд. 8 даъвогар дар мақомоти давлатӣ фаъолият мекунад, 7 тани дигар дар созмонҳои тиҷоратӣ, 29 нафар дар созмонҳои иҷтимоӣ. 9 тани дигар муваққатан бекор ҳастанд ва 6 каси дигар нафақахӯр.

Комиссияи интихоботӣ қабули ҳуҷҷатҳоро барои номзад шудан ба мақоми президентӣ ба охир расонд. Дар маҷмуъ, 59 нафар барои номзад шудан ариза додаанд.