Тоҷикистон ва Қатар ҳамкориро дар соҳаи меъморӣ, шаҳрсозӣ ва сохтмон рушд медиҳанд

Дар асоси Ёддошти тафоҳуме, ки 8 июни соли равон дар доираи сафари давлатии Амири Қатар ба Ҷумҳурии Тоҷикистон дар ҳузури сарони давлатҳо – муҳтарам Эмомалӣ Раҳмон ва муҳтарам Шайх Тамим ибни Ҳамад Оли Сонӣ байни ҳукуматҳо ба имзо расид, ҳамкории дуҷониба дар соҳаи меъморӣ, шаҳрсозӣ ва сохтмон рушд меёбад. Дар ин хусус ба АМИТ «Ховар» дар такя ба иттилоъи Кумитаи меъморӣ ва сохтмони назди Ҳукумати Ҷумҳурии Тоҷикистон хабар додаст.

«Ёддошти тафоҳум ба амалигардонии фаъолияти сохтмонӣ ҷиҳати барқарор намудани муносибатҳои дуҷониба ва рушди ҳамкорӣ дар соҳаи меъморӣ, шаҳрсозӣ ва сохтмон байни Тоҷикистон ва Қатар, инчунин фароҳам овардани шароити мусоид барои ташкилотҳои лоиҳакашӣ ва сохтмонӣ нигаронида шуда, барои омода намудани лоиҳаҳои муштарак, нақшаҳо ва ҷорӣ кардани дастовардҳои илмиву техникӣ дар соҳаи меъморию сохтмон ва инфрасохтор заминаҳои ҳуқуқии муносиб фароҳам меорад», — иброз доштанд дар Кумита.

Бояд тазаккур дод, ки Ёддошти тафоҳум байни Ҳукумати Ҷумҳурии Тоҷикистон ва Ҳукумати Давлати Қатар оид ба ҳамкорӣ дар соҳаи сохтмон ва инфрасохторро Раиси Кумитаи меъморӣ ва сохтмони назди Ҳукумати Ҷумҳурии Тоҷикистон ва Вазири корҳои хориҷии Давлати Қатар ба имзо расониданд.

Ёдовар мешавем, ки дар маҷмуъ, аз рӯйи натиҷаҳои мулоқоту музокироти сатҳи олӣ байни Ҷумҳурии Тоҷикистон ва Давлати Қатар 15 санади нави ҳамкорӣ ба имзо расид.